India-in ṭan lam a thlang dawn a nih chuan 'muanna' a thlang ang : Jaishankar

Union external affairs minister S Jaishankar chuan nimina Lok Sabha-a thu a sawiah, Russia leh Ukraine indo mek chungchangah India-in a ṭan lam a thlang a nih chuan 'muanna' a thlang ang, a ti.

Ukraine rama indona thleng mek chungchanga India chetdan politics lam zawnga lo hmehbel tum tlatna chu thil pawi tak a ni, a ti bawk. "Buaina thleng hi kan duh loin kan dodal a ni. Thisen chhuahna hmang hian eng buaina mah chinfel theih a ni lo tih kan ring tlat a, pawisawi lo mi tam takin nunna an chan phah zawk ṭhin. Tunlai khawvelah inbiakna leh, palaite indawr tawnna hi eng buaina pawh ni se, a chinfelna dik ber a ni," tiin a sawi.

Russia-in Ukraine a do hnuah India hian Russia demna thu a la tichhuak lo a, UN hnuaia Russia demna resolution an siamah pawh vote thlak loin a la hai zel a ni. Mahse Thawhlehni khan Ukraine-a Bucha khuaa thil thleng a dem thu leh, chhuichian a phut thu a sawichhuak a ni.

Ukraine hmarlam, Bucha khuaaah hian civil mi thahte ruang chu kawtthlerahte hmuh niin, mi eng emaw zat phum khawmna, thlan lian tak pawh hmuh chhuah a ni bawk. Mithhi ruang hmuhte hi an kut phuarsak an ni. He khua hi Russia sipaiten an lak hnuah Ukraine sipaite an la let tawh a ni. Ukraine leh khawthlang ramte chuan Russia sipaite chu war crime thlenah puhin, International Criminal Court-ah zualko ngei an tum tih an sawi.