BJP-in Foundation Day an hmang

Bharatiya Janata Party (BJP) chuan nimin khan Foundation Day vawi 42-na an hmang a, video conference hmangin prime minister Narendra Modi chuan party worker-te hmaah thu a sawi.

PM Modi chuan a hming hmerah sawi lang loin eptu party a bei zui a, chhungkaw bil kaihhruai party-ah chuan ṭhalaite tan hmasawnna a awm lo tiin, 'phatsan an ni leh zel a ni," a ti. Hemi rual hian hetianga thil dik lo lak aṭanga ram hruaichhuak theitu chu BJP chauh a ni, a ti. BJP chuan kum riat liam ta aṭang khan ‘Ek Bharat, Shreshtha Bharat’ (One India, Great India) atan theihtawp a chhuah a ni, tiin a sawi.

BJP hian an din champha lawmna pual hian tun karah thil hrang hrang buatsaih an tum a, BR Ambedkar piancham, April 14-ah a kharna hi an nei ang.

Central-a rorellai, BJP hi India rama political party lian ber a ni mek a ni. Party member ngah ber a nih bakah, kum 30 hnuah Rajya Sabha-a party MP 100 chuang nei thei awmchhun a ni mek bawk.