Bengaluru Airport-ah Amnesty India hotu hlui zin tur dang

Amnesty International India hotu hlui, Aakar Patel chuan nimin khan US-a a zin tur chu Bengaluru Airport-ah dan a ni tih a sawi.

Patel chuan Central Bureau of Investigation (CBI)-in Amnesty India laka thubuai a siam kaihhnawihah ram pawna zinchhuah phal loh, exit control list-ah dah a lo ni tih CBI officer chuan a hrilh niin a sawi. Hei hi a hmain engmah a hriat loh thu a sawi a, Gujarat sorkarin a zinna tur atan hian phalna a pe tawh chungin, Bengaluru airport-ah thlawhchhuah phalsak a ni ve ta lo tih a sawi a ni. Patel hi US-a university pathum - Michigan University, Berkley University leh New York University-a thu sawi tur a ni.

CBI hian kum 2019, November thla union home ministry-in Foreign Contribution (Regulation) Act, 2010 leh Indian Penal Code hnuaia dan an bawhchhia nia complaint a thehluh avangin, Amnesty International leh a thawhpui pawl pathumte laka thubuai a lo ziak lut tawh a ni. Hemi hma, kum 2018 khan Enforcement Directorate chuan Bangalore-a Amnesty office chu an lo dapsak tawh bawk.