India Covid-19 vaccine siam mihringah enchhin dawn

India ram chhunga Covid-19 vaccine siam chhuah tuma hma lak meknaa Indian Council of Medical Research (ICMR) leh Bharat Biotech International Limited (BBIL) thawkdunin an siam, COVAXIN chu mihringah enchhin a ni dawn. 

ICMR chuan mihringa enchhinna neihna tur institute 12-te hnenah lehkha thawnin, internal committee phalna la tur leh, clinical test neihna tur mihring pawh zawng turin a hriattir a ni. 

Kar liam ta khan Drug Controller General of India (DGGI) chuan Covid-19 vaccine hi mihringa endik phalna a pe a, tun thla chhungin clinical trial Phase 1 leh II hi neih tum a ni. Nimin khan ICMR chuan institution 12-ah mihringa enchhina clinical trial neih tum a nih thu hi a tarlang zui ta a ni.

Ram chhunga Covid-19 hri a darh chhoh zel avangin he hri kaite enkawl damna tur hi hmanhmawh tak leh fimkhur tak chung sia peih fel vat tum a ni. Vaccine siam chhuah tuma hma la tu ber,  ICMR chuan August 15-ah Covid-19 vaccine, COVAXIN peih fel hman an tum thu a lo tarlang tawk bawk.