Parliament Budget Session tihtawp a ni

Parliament budget session chu ruahman lawk aia ni khatin zawh hma a ni a, nimin khan Lok Sabha leh Rajya Sabha chu tiam chin awm loa tihtawp a ni.

Budget session hi January 31 khan ṭanin, president Ram Nath Kovind chuan House pahnih joint sitting hmaah thu a sawi. A tuk, February 1-ah union finance minister Nirmala Sitharaman chuan union budget 2022-23 a pharh nghal a ni.

Session thawh khatna hi February 11 khan tihtawp a ni a, hun eng emaw chawlh lawk an neih hnuah March 14-ah session thawh hnihna hi chhunzawm leh niin, nimin khan tihtawp a ni ta a ni.

Lok Sabha speaker Om Birla chuan 17th Lok Sabha session vawi riatnaah hian rorel inkhawm ṭum 27 neih a ni tih sawi a, hemi chhunga total productivity chu 129% a ni, a ti.

Rajya Sabha chairman M Venkaiah Naidu chuan rorel chhunga inauhbuai avanga inkhawm tihtawp a ngaih fo avangin rorel hun darkar kua leh a chanve dawn an hloh tih a sawi a, mahse an hun hlohte hnawhkhatna atan darkar kua leh minute 16 hun an hman belh thung tih a sawi. Budget session chhunga Rajya Sabha productivity chu 99.8% niin, minute 10 dang tal chu hun neih belh thei se 100% a tling dawn tih chairman chuan a sawi.

Lok Sabha-ah hian bill 12 pass hman a ni a, heng zingah hian Finance Bill, Delhi Municipal Corporation (Amendment) Bill, The Weapons of Mass Destruction and their Delivery Systems (Prohibition of Unlawful Activities) Amendment Bill an tel. Rajya Sabha-ah bill 11 pass a ni bawk.

Session chhung hian climate change, Ukraine rama thil thleng leh ram chhunga infiamna chawilar a ṭul chungchang chu Lok Sabha-ah sawihona hun hman tel a ni bawk.