Sipai hmanrua leh ralthuam lakluh loh tur list tihchhuah belh

Defence minister Rajnath Singh chuan nimin khan sipai hmanrua leh ralthuam, kum nga chhung atana ram pawn aṭanga lakluh khap tur list pathumna a tichhuak leh. Hemi chhung hian heng hmanrua mamawhte hi ramchhungah siam an ni ang.

Nimina Defence Minister-in list pathumna a tihchhuahah hian defence equipment 101 tarlan a ni a, hei hian defence sector lama ramin intodelhna kawnga hma a sawn chhoh zel zia a tilang a ni, tiin a sawi.

Kum 2020 August thla khan defence hmanrua, ram dang aṭanga lakluh loh tur list hmasa ber tihchhuah a ni a, hetah hian artillery gun, short-range surface-to-air missile, cruise missile leh offshore vessel-te an tel. Nikum May thla khan list pahnihna tihchhuah leh niin, item 108 telh a ni a, airborne early warning system, tank engine leh radar te an tel.

Sorkar laipui chuan hun eng emaw chen aṭang khan defence hmanrua lamah intodelh tumin hma an la a, hei vang hian ram dang aṭanga lakluh pawh a titlem chho a ni.