March 2023-ah Ayushman card vbc 30 pek hman tum

Sorkar laipui chuan flagship public health insurance programme, Ayushman Bharat Pradhan Mantri Jan Aaorgya Yojana (ABPM-JAY) hnuaiah nakkum March 31-ah chhungkaw rethei leh dinhmun chhe zawk vaibelchhe 30 hnenah Ayushman card pek chhuah hman a tum.

Kum 2018-a scheme kalpui a nih ṭan aṭang khan Ayushman card hi vaibelchhe 17 chuang pek chhuah a ni tawh tih National Health Authority (NHA) chief executive officer R.S Sharma chuan a sawi. NHA hi sorkar laipui flagship-a implementing agency a ni.

RS Sharma chuan, "Beneficiary hi vaibelchhe 50 vel an awm thei dawn a, financial year kal mekah hian card hi vaibelchhe 30 pek hman an tum a ni. Card hi en chuan plastic card mai ani a, mahse mipuite tan chuan anmahni thuam chakna hmanrua a ni thung a ni," a ti.

Khawvela sorkar hnuaia public health insurance scheme lian ber nia sawi, ABPM-JAY scheme hmang thei chhungkua hian kum khatah private leh sorkar hospital-ah health cover Rs nuai 5 thleng an nei thei a ni.

Card pek chhuah hi chak zawka kalpui a nih theihna turin nikum khan sorkar chuan dan pawh a thlak danglam niin Sharma chuan a sawi. A hma chuan beneficiary-te chuan Socio-Economic and Caste Census (SECC) 2011 behchhanin, an eizawnna leh dinhmun azirin Rs 30 an pek hnuah card hi an lachhuak thei a ni. Mahse chhan hrang hrang avanga card lak chhuah tum lo an awm avangin, NHA chuan card hi a dawng thei turte hnenah a sem ta zawk a ni. Hemi atan hian state tinte chu common service centre, Jan Sewa Kandra hnuai ah a thawhpui a, card hi siam ringawt loin an sem zui bawk.