Vawiinah state panga inthlan result puang dawn

Vawiin hian state panga - Chhattisgarh, Madhya Pradesh, Mizoram, Rajasthan, leh Telangana-a assembly inthlana vote tlate chhiarin, result puan nghal a ni dawn.

State panga zinga pathum Chhatisgarh, Madhya Pradesh leh Rajasthan-te hi BJP sorkar mekna a ni a, Telangana-ah hian Telangana Rashtra Samithi (TRS) chu sorkar lai niin, Mizoram chu Congress party sorkar mekna a ni bawk.

Chhattisgarh:

Assembly seat 90 awmna, Chhattisgarh-ah hian November 12 leh 20 khan inthlan hi thawh hniha neih a ni. Sorkarna siam turin seat 46 neih tlin a ngai. Kum 2013 inthlanah khan BJP chuan seat 49 lain, Chief Minister Raman Singh chuan a term thumna atan BJP sorkarna a siam leh a ni. Hemi kuma inthlanah hian Congress party chuan seat 39 a la bawk. BJP vote hmuh zat hi vote tla aṭangin 41.04% a ni a, Congress hian vote 40.29% a hmu bawk.

Madhya Pradesh:

Madhya Pradesh-ah assembly seat 240-ah inthlan hi thawh khata neih niin, November 28 khan vote thlak a ni.

Kum 2013-a assembly inthlanah BJP chuan seat 240-ah seat 165 lain, vote tla aṭanga 45% dawn a hmu pha. Congress chuan seat 58 neiin, vote 36.38% a hmu a ni. BJP CM term thum chelh thei, Shivraj Singh Chauhan chuan Hindutva chawilarin Hindu vote a hui nasa hle a, sorkarna an siam hnuah pawh bawng humhalhtu tur ministry hran a siam hial a ni.

Rajasthan:

Rajasthan assembly inthlan hi December 7 khan neih a ni a, seat 200 zingah seat 199-ah vote thlak niin, bial pakhatah chuan candidate pakhat a thih vangin vote thlak hun hi sawnhlat a ni.

Kum 2013-a assembly inthlanah BJP chu hneh taka thlan tlin niin, seat 200 awmah seat 163 a la pha a, Chief Minister-ah Vasundhara Raje-i dah a ni. Congress in seat 21 chiah a chang a ni. Mahse kumin by-poll neihah Congress hian BJP a hneh thung a, hei vang hian beiseina an nei sang hle.

Mizoram:

Assembly seat 40 awmna Mizoramah chuan November 28 khan vote thlak a ni.

Congress sorkarna state-ah hian kum 2013 inthlanah khan Congress-in seat seat 34 a la a, a vote hmuh zat hi 44.6% a tling. Mizo National Front chuan seat nga a la bawk.

Telangana:

Telangana-a assembly seat 119-ah December 7 khan vote thlak a ni.

Kum 2014-a assembly inthlanah Telangana Rashtra Samithi (TRS) chuan seat 63 a la a, Congress in seat 21 leh BJP in seat nga an nei.