Institution hrang hrang tichhiaah NDA sorkar puh

BJP hruaitu hlui Yaswant Sinha chuan Prime Minister Narendra Modi-a kaihhruai NDA sorkar chu ramchhunga institution hrang hrangte tichhiahah a puh a, union cabinet thlengin a tichhia a ni, a ti.

West Bengal-a rorellai, Trinamool Congress ten Pathianni-a Kolkata-a talk show, 'Idea of Bengal' an huaihawtah Yaswant hi telin, prime minister chu bill pawimawh tak tak ngaihtuahna kawngah Rajya Sabha ngai pawimawh loah a puh. "Modi-a kaihhruai sorkar chuan institution hrang hrangte a tichhe tawh a ni. Hei aia a tihchhiat pawi ber chu union cabinet hi a ni" tiin a sawi. Hemi rual hian TMC hotu leh West Bengal Chief Minister Mamata Banerjee-i chu Prime Minister ṭha tak ni tura theihna nei ṭha a nih thu a sawi nghal bawk.

Sinha chuan NDA sorkarin union cabinet hlutna a tihchhiat dan chu sawifiah zuiin, cabinet hriatpui lohin thutlukna pawimawh leh lian tham tak tak siam a nih thu a sawi a, heng zingah hian Rafale jet deal leh pawisa tih thih chungchang pawh a tel a ni, a ti. Pawisa tih thih chuan ram tana chhiatna nasa tak a ni a, mahse NDA sorkar chuan a thiltihin nghawng ṭha lo tak a neih leh a economic policy hlawhchhamna a neihte thup tumin economic growth rate te pawh a siamchawp leh a ni, a ti.

BJP kaihhruai sorkar chuan economic growth rate tihdanglam nan GDP chhutdan method te an thlak a, mahse NDA sorkar aiin sorkar hmasa, Congress kaihhruai UPA a cheṭha zawk tih a lo lanchhuah leh tak avangin data-te chu website aṭangin an paih leh a, a hnuah sorkar chuan NDA sorkar economy rate a ṭhat zawk dan an siamchawp leh a ni, tiin a sawi.