Seat insem danah lungawi loin Union Minister a bang

National Democratic Alliance (NDA) hnuaia BJP thawhpui, Rashtriya Lok Samta Party (RLSP) hotu Upendra Kushwaha chu nimin khan union minister a nihna aṭangin a bang.

RLSP hotu hi kum 2019 Lok Sabha inthlan neihpui tura NDA hnuaia thawkho party hrang hrangte seat sem danah BJP hruaitute chungah a lungawi lo nia sawi a ni a, hei vang hian nimin zing khan Prime Minister Office-ah union minister a nihna aṭanga a banna hi a thawn a ni. Nimina NDA hnuaia thawkhote meeting neihnaah pawh a kal dawn loh thu a sawi nghal bawk.

BJP chuan nakkum Lok Sabha inthlanpui neih turah RLSP hi Bihar-ah seat hnih bak pek a tum lo nia sawi a ni. BJP hian Bihar-ah rorellai, Chief Minister Nitish Kumar-a kaihhruai Janata Dal United (JDU) chu a thawhpui avangin seat tam zawk JDU tan hian pek a tum a, inremna pawh an siam tawh nia sawi a ni. Bihar-ah hian Lok Sabha seat 40 a awm a ni.

Bihar-based party, RLSP hian NDA a thawhpuina hi hun eng emaw chen aṭang khan tihtawp a lo tum tawh nia sawi a ni, Kushwaha pawh hian BJP in Lok Sabha inthlanpui neih tura atana seat an pek tum pawh a lo hnar tawh a ni. NDA-a tel zawm leh zawm loh chungchang hi December 12-a RLSP hruaitute meeting pawimawh, 'Chintan Shivir'-ah ngaihtuah a ni dawn a ni.

Upendra Kushwaha hian tunhnaiah BJP president Amit Shah leh Prime Minister Narendra Modi-te hmuh a tum chu appointment an pek theih loh avanga mak a tih thu a lo sawilang tawh a ni. Thil dangah an buai deuh a nih pawhin phone tala an biak theih thu sawiin, biak pawh an tum miah loh thu a sawi a ni. Thla hmasa khan Bihar-a Bihar Chief Minister leh Janata Dal United (JDU) hruaitu Nitish Kumar chu an party MLA-te thlem luh tumah Kushwaha hian a lo puh tawh bawk.