India-ah Covid daily positivity rate 0.24% a ni tawh

India ramah Covid-19 hri leng a ziaawm tawh hle a, nitina hri kai thar hmuh chhuah pawh an tlahniam zel.

Ningani khan hri kai thar 1,109 awmin, hri kai hmuh chhuah tawh hi 4,30,33,067 an awm tawh. Nitina hri kai thar, daily positivity rate chu 0.24% ni tawhin, weekly positivity rate chu 0.23% a ni tawh bawk.

Covid-19 hri vanga thi hi Ningani khan mi 43 an awm belh a, ram pumah hripui thihpui hi mi 5,21,573 an awm tawh a ni. Heng zinga 1,47,806 chu Maharashtra state-a mi niin, Kerala-ah 68,264, Karnataka-ah 40,056, Tamil Nadu-ah 38,025, Delhi-ah 26,155, Uttar Pradesh-ah 23,498 leh West Bengal-ah mi 21,200-in Covid hri an thihpui tawh a ni. Hetih lai hian ram puma Covid-19 hri vanga thi zinga 70% chuang chu natna benvawn nei an ni tih union health ministry chuan a tarlang.

Hri kai mek, active case hi hri kai tawh aṭangin 0.03% a ni mek a, hri kai enkawl dam tawh, recovery rate chu 98.76% ah a kai tawh thung.

Covid vaccine pawh pek chhuah chhunzawm zel a ni a, nimin zing dar 8 thleng khan ram pumah vaccine hi dose vaibelchhe 185.38 pek a ni tawh.

Puitling tan booster dose lak theih tawh dawn
Sorkar laipui chuan puilting kum 18 chin, Covid vaccine dose hnih la tawhte chu an duh chuan private vaccination centre-ah Covid booster dose, precaution dose tia a sawi chu Pathianni aṭangin lak a phalsak.

Booster dose la tur hian Covid-19 vaccine dose hnihna an lak aṭang thla kua a tling tur a ni.

Ram puma a thlawna Covid vaccine pekchhuah runpui kalpuiah, vaccine dose khatna leh dose hnihna bakah healthcare worker, frontline worker leh kum 60 chunglamte chu precaution dose pek chhuah pawh kalpui chhunzawm zel a ni dawn tih ministry chuan a sawi bawk.

Nimin zing thleng khan India ramah kum 15 chunglam zinga 96% in Covid-19 vaccine dose khatna an la tawh a, dose hnihna la tawh hi 83%an awm tawh bawk a ni. Precaution dose hi vaibelchhe 2.4 chuang pek chhuah ani tawh bawk.

Kum 2021, January thla aṭang khan India rama Covid-19 vaccine pekchhuah hna hi kalpui ṭan a ni a, a huam chin pawh tizau zelin, kumin kumtir lam aṭang khan kum 12 chinte pek an ni veleh a ni. Nimin thleng khan kum 12-14 inkar 45%-te chuan vaccine dose khatna hi an la tawh tih ministry chuan a tarlang.