English thlaktu atan local language ni loin Hindi hi pawm tur a ni : Amit Shah

Union home minister Amit Shah chuan nimina Parliamentary Official Language Committee meeting vawi 37-na neihah, sorkar enkawlna kawnga ṭawng hmanah English thlaktu atana local language ni lo Hindi zawk chu pawm a ni tur a ni, a ti.

Amit Shah chuan prime minister Narendra Modi chuan sorkar enkawlna kawnga ṭawng hman chu Official Language-a hman turin a ti a, hei hian Hindi ṭawng pawimawhna pawh a tipung dawn a ni, tiin a sawi. Cabinet agenda pawh 70% chu Hindi-a buatsaih a ni tawh a, ram inpumkhatna turin Hindi chu official language-a hman a hun tawh a ni, tiin a sawi.

Union home ministry-in Amit Shah thusawi chungchanga thuchhuah a siamah, Shah hian ram chhunga hnam hrang, ṭawng hrang hrang hmangte chu an inbiakpawhna atan 'language of India' an hmang tur a ni tiin, state hrang hrang mite chu English ni lo, Hindi-in an inbe tur a ni tia a sawi thu a tarlang.

Home Minister chuan zirlai naupangte pawh elementary aṭanga Class IX thlenga Hindi thiam tir a ṭul thu te, Hindu teaching examination pawh ngaih pawimawh zual a ṭul thu a sawi bawk.