Politician-te thubuai rang zawka ngaihtuah tura ngenna SC-in April 15 hnu lamah a ngaihtuah dawn

Supreme Court chuan politician, MP leh MLA-te thubuai rang zawka ngaihtuah a, Central Bureau of Investigation (CBI) leh agency dangten an chungthu chak zawka chhuizui ngenna, public interest litigation (PIL) thehluh chu April 15 hnu lamah ngaihtuah a remti.

Chief justice of India NV Ramana kaihhruai bench chuan senior advocate, Vujay Hansaria hnenah he ngenna hi rang taka ngaihtuah ngai a ni tih a sawi. Hetih lai hian politician thubuai, kum nga chuang tihkhawtlai hi 2,000 dawn a awm mek a, heng zinga a tam zawk chu lower court lamah tihkhawtlai an ni.

Justice Krishna Murari leh Hma Kohli-te telna bench chuan, Supreme Court pawn lamah chuan kum tam tak pawh an nghak thei ang a ,mahse Supreme Court-a thlen a nih chuan thubuaite hi rang taka ngaihtuah an ni ang, an ti. April 15 hnu lamah hemi chungchang hi ngaihtuah chhunzawm turin an dah a ni.

Report chuan Parliament member leh Legislative Assembly/Council member thubuai hi 4,984 tikhawtlai mek a ni a, heng zingah thubuai 1,899 chu kum nga chuanga upa te an ni tawh. Kum 2018, December 4-a politician thubuai 2,775 chu tihtawp a nih hnuah, MP/MLA laka thubuai thehluh hi 4,984-ah a pung chho leh a ni. Hei hian Parliament leh state legislative assembly-ahte criminal case nei lai an pun belh zel tih a tilang a ni, tiin report chuan a tarlang. Hei vang hian heng thubuaite hi a rang thei anga chinfel chu thil ṭul a nih thu a sawi.