Private Hospital-te'n Covid booster dose pe chhuak

Sorlar laipuiin thuchhuah a lo siam tawh angin, ram chhung private hospital-te chuan nimin aṭang khan kum 18 chung lamte tan Covid-19 vaccine dose thumna, booster dose an pe chhuak ṭan ta .

Precaution dose tia sawi bawk, booster dose hi kum 18 chung lam, Covid vaccine dose hnihna an lak aṭanga thla kua tling tawhten an la thei a ni.

Sorkar chuan precaution dose hi healthcare leh frontline worker bakah kum 60 chunglamte tan a thlawnin a pe a, mipui nawlpui tan erawh a pe chhuak lo thung. Mahse nimin aṭang khan a duh tan man chawiin private hospital-ah lak theih a ni ta a ni.

India rama Covid vaccine siamtu lian pahnih chuan Inrinni liam ta khan vaccine man hi an tihniam a, booster dose hi Rs 225-in an tihniam a ni. Private vaccination centre-te hian service charge-ah Rs 150 chin an la thei dawn bawk. A senso zat tur hi Co-WIN portal-ah en theih a ni ang. Private centre-te hi dose khat eng zatin nge an pek thei dawn tih Co-WIN-ah hian tarlang vek turin hriattir an ni tih union health secretary Rajesh Bhushan chuan a sawi.

Nikum January 16 khan India ramah Covid-19 vaccine hi pek chhuah ṭan niin, healthcare worker-te chu pek hmasa ber an ni a, Febuary 2 aṭangin frontline worker-te pek an ni zui ve leh. March 1-ah kum 60 chung lam leh, kum 45 chin natna benvawn neite pek an ni leh. Kum 45 chunglam tan nikum April 1 aṭangin vaccine hi pek a ni leh a, hemi hnu May 1 aṭangin ram pumah kum 18 chunglamte chu Covid-vaccine pek ṭan a ni.

Kumin January 3 khan tleirawl kum 15-18 inkarte pek ni lehin, January 10 aṭangin healthcare leh frontline worker bakah kum 60 chunglam, natna benvawn neite chu precaution dose hi pek an ni. March 16 aṭang khan kum 12-14 inkarte hnenah Covid vaccine hi pek an ni leh bawk.

Nimin zing dar 8 thleng khan ram pumah Covid vaccine hi dose 1,85,70,71,655 pek chhuah a ni tawh.

Ram pumah hri kai mek 11,132 awm
Union home ministry-in a tarlan danin, nimin zing dar 8 thleng khan India ramah Covid-19 hri kai mek, active case 11,132 an awm.

Hri kai mek hi hri kai hmuh chhuah tawh aṭangin 0.03% an ni a; hri kai enkawl dam, recovery rate chu 98.76% a ni a, hri kai zinga 1.21% in Covid hi an thihpui a ni.

Hri lengin ziaawm lam pan a, hri kai thar an tlakhniam zel hnuah, Covid variant thar, XE variant kai chu India ramah pahnih hmuh an ni tawh. Mumbai-a March 11-a Covid hri kai, kum 67 chu a sample genome sequencing tura thawn a nih hnuah XE variant hi a kai tih finfiah a ni. Amah hian Covid vaccine full dose a la tawh a, a dinhmkun pawh a ngaihtuahawm lo a,symptom pawh a nei lo nia sawi a ni. Inrinni khan Gujarat-a Vadodara-ah XE variant kai dang pakhat hmuh a ni leh bawk.

Official-te chuan Covid hri insiam thar, XE variant hi Omicron aiin 10% in inkaichhawn a awlsam zawk niin an sawi.