Amit Shah-a'n Indo-Pak border viewing point a hawng

Union home minister Amit Shah chuan nimin khan Gujarat-a Banaskantha district-a Nada Bet-ah Indo-Pakistan border viewing point a hawng.

Viewing point hi Waga-Atari border zulah siam a ni a, he hmun aṭang hian India border-a army post-a sipaite hnathawh dante thlir theih a ni dawn a, Border Security Force (BSF) sipaiten retreat ceremony an neih ṭhin pawh thlir theih a ni ang.

Gujarat tourism department chuan Seema Darshan Project hnuaiah border viewing point hi tourist attraction destination atan a siam a, cheng vaibelchhe 125 a seng a, tlawhtu pawh a ngah hle rin a ni. Sipaite chetla bakah Indian Army leh BSF-te ralthuam hmante chu photo gallery-ah pho lan a ni dawn bawk a, surface-to-surface and surface-to-air missiles, T-55 tanks, artillery guns, torpedoes, wing drop tanks leh MiG-27 aircraft-te pawh an tel a ni.

India ram venhimna atana an nunna hlantu, sipai huaisente hriatrengna 'Ajay Prahari' pawh din niin, feet 40-a sanga siam a ni.