Zirlai pawl 2 intihbuai vangin JNU-ah venhimna tikhauh

Delhi-a Jawaharlal Nehru University-a non-vegetarian food chungchang avanga campus chhunga zirlai pawl pahnih inkara buaina a chhuah avangin nimin khan venhimna tihkhauh a ni.

Pathianni khan JNU-a Kaveri Hostel-ah Ram Navami hunlaia non-vegetarian food siam nia inpuh chungchangah zirlai pawl pahnih, RSS zirlai pawl Akhil Bharatiya Vidyarthi Parishad (ABVP) leh JNU Students; Union (JNUSU) member-te inkarah buaina a chhuak a, zirlai parukin hliam an tuar.

Buaina chhuak vang hian campus pawn lamah venhimna tihkhauh ani a, campus chhung lamah erawh university security guard-te an duty thung. University hian an ngen a nih chuan campus chhungah pawh police-te duty tir an nih tur thu police official chuan a sawi.

JNUSU chuan ABVP member-te hian Pathianni khan Kaveri Hostel-a ei siamtu chu sa lam chi engmah siam lo tura vauin a hnuah kut an thlak zui niin an sawi. Hostel-a mess committee pawh beiin, dinner menu pawh tihdanglam tirin, zirlai zawng zawngten non-vegetarian item pawh an paih tir vek niin an sawi. Hostel-a ei tur siam dan hi thla tir lamah duan lawk vek zel niin; Nilaini, Zirtawpni leh Pathianni zanriahah hian non-vegetarian food hi siam tel a ni ṭhin.

Mahse ABVP lam chuan an puhna hi thu dik lo tiin an sawi thung a, Ram Navami puala hostel-a puja programme an buatsaih chu tibuaiah an puh thung. Zirlai pawl pahnih member-te lunga intawngin an intibuai zui ta a ni.

JNU thuneitute chuan nimin khan zirlaite chu campus chhunga buaina siam zawnga che tawh lo turin a hriattir.

Police-te chuan JNUSU, SFI leh DSF leh AISA member-te complaint thehluh behchhanin, nimin khan ABVP member-te lakah FIR an ziaklut. Hetih lai hian ABVP member-te pawhin complaint hi thehluh ve an tum thu an sawi bawk.

Jawaharlal Nehru University Teachers' Association (JNUTA) chuan Kaveri hostel-a ei siam chungchanga buaina chhuak chu an dem thu sawiin, zirlai leh staff-te himna chu ngaih pawimawh a ṭul thu an sawi.