Biden leh Modi-te'n virtual meeting nei

Prime minister Narendra Modi leh US president Joe Biden-te chuan nimin khan virtual meeting an nei.

Ram pahniha foreign leh defence official-te chuan 2+2 meeting an nei dawn a, hemi hma hian hruaitu pahnihte hian virtual meeting hi an lo nei hmasa a ni. Meeting an neih tur hi a hmain puanzar lawk a ni lo a, Pathianni khan an sawilang chauh a ni.

White House chuan President Biden leh PM Modi-te meeting hian ram pahnih sorkar, economy leh ram mipuite inzawmna nghet zawk a thlen ngei an beisei thu a sawi. Thil hrang hrang sawidunin, Covid-19 hri leng mek chungchang te, climate crisis, global economy tihchak dan tur leh, international border-a security tihchak dan tur te, democracy leh Indo-Pacific chungchangte an sawi dun dawn tih White House chuan a lo tarlang lawk a ni. Russia-Ukraine indona thleng mek pawh an sawidun bawk.

US-India hian 2+2 ministerial meeting an nei dawn bawk a, secretary of state Antony Blinken, secretary of defence Lloyd Austin, external affairs minister S Jaishankar leh defence minister Rajnath Singh-ten meeting hi an nei dawn a ni.