Covid vanga thi chhungte zángnadawmna pek hun bithliah

Supreme Court chuan March 20 hma lama Covid-19 vanga thi chhungte hnena zángnadawmna dilna hun thehluh theih hun chu ni 60 a bithliah a, March 20 hnu lama thi chhungte chuan ni 90 chhungin dilna an thehlut thei ang tih nimin khan a sawi.

Hemi rual hian a hmaa thupek a lo tihchhuah tawh angin, zángnadawmna hi dilna thehluh aṭanga ni 30 chhunga pek chhuah chhunzawm tura tih a ni bawk.

Court chuan harsatna leh buaina dang eng emaw avanga hun tiam chhunga zángnadawmna dilna hi thehluh theih a nih dawn loh chuan, Grievance Redressal Committee hnenah thlen a, anni kaltang hian dilna hi thehluh tur a ni, a ti.

Covid vanga thi chhungte hnena zángnadawmna pek ṭhin hi dik lo taka dil an awm nia sawi a nih avangin, an dilna theluhte pawh uluk taka zirchian a ni dawn a, dawt hmanga dil an awm a nih chuan DM Act, 2005-a Section 52 hnuaiah hrem theih an ni ang.

Pathianni khan India ramah Covid-19 vanga thi hi mi paruk awm belh lehin, hripui thihpui hi 5,21,691 an awm tling tawh a ni.