Madhya Pradesh : BSP in Congress thlawp dawn

Madhya Pradesh assembly inthlan neih zawh takah Congress party chu Mayawati-i kaihhruai Bahujan Samaj Party (BSP) chuan sorkarna siam turin an thlawp dawn.

Congress hi party mala seat la hnem ber niin seat 114 a la a, mahse sorkarna siam tura seat neih ngai zat seat 116 chu seat hnihin a pha lo a ni.

BSP hian seat hnih lain, an party thlawpnain Congress chuan sorkar a siam dawn ta a ni. Seat khat latu, Samajwadi Party (SP) pawhin Congress hi an thlawp dawn tih a sawi bawk.

BSP hotu, Mayawati chuan a ṭul a nih chuan Rajasthan-ah pawh Congress chu an thlawp dawn tih a sawi. "Congress thuthlung te hi kan pawmpui vek lo. Mahse BJP ten thuneihna an chan lohna turin Congress hi kan thlawp zel thei a ni," a ti.

Assembly seat 230 awmna, Madhya Pradesh assembly inthlan result hi darkar 24 chhung zet chhiar a nih hnuah result kimchang hi tihchhuah theih a ni ta chauh a ni.

Madhya Pradesh Chief Minister term thum ni thei leh BJP hruaitu Shivraj Singh Chouhan chuan an party an chak loh a pawm thu sawiin, BJP sorkar siam thei turin MLA a ngah tawk lo tih a sawi. BJP hian seat 109 a la a ni. Singh hian nimin khan Governor Anandiben Patel hnenah CM a nihna aṭanga banna a thehlut nghal bawk.

Nimin tlai vek khan Congress hotu pathum, Kamal Nath, Jyotiraditya Scindia leh Digvijaya Singh-te chuan Governor hmuin sorkarna an siam theih thu an hrilh. Nimin vek khan party MLA te chuan chief minister tur an thlan nghal rin a ni a, CM atana sawi rik zingah Kamal Nath chu a langsar ber a ni.