PM Modi hnen aṭangin thil tam tak ka zir - Rahul Gandhi

Congress president Rahul Gandhi chuan Prime Minister Narendra Modi chu hneh taka thlan niin thuneihna pek ni mah se a hun ṭha neih erawh chu a bawhchhe ta niin a sawi.

State panga inthlan result puan zawh takah Congress party-in hnehna an chan hnua thu a sawiah, Rahul Gandhi chuan PM Modi chu pawi a tihpui thu a sawi rualin, a hnen aṭang hian thil tam tak a zir tih a sawi. "Ka nu hnenah pawh PM Modi hnen aṭangin thil tam tak ka zir tih ka lo hrilh a ni. Kum 2014 Lok Sabha inthlanpuiah hneh taka thlan tlin niin mipuite tana thil ṭha ti turin hun ṭha pek a ni. Mahse heng a hun neihte hi a bawhpelh avangin a tan pawh pawi ka tihpui a ni", a ti.

Rahul chuan kum 2014 inthlanpuia chiang taka Congress hneh an nihna aṭang khan zirtirna ṭha tak a pek thu a sawi bawk. "Ka tana zirlai pawimawh tak a lo ni. Kha thil aṭang khan inngaihthlawmna leh mipuite aw ngaihthlak pawimawhna ka zir a ni. Kan ram mipuite hi zirtirtu ṭha ber an ni a, mahse tun ṭumah hian PM Modi hian an aw hi a ngaithlak sak lo a ni", a ti.

Eptu party hruaitute chuan Rahul Gandhi hi Congress hruaitu lu ber dinhmun chelh thei tura an chhungkaw hming ṭangkaiah puhin an sawisel fo. Mahse Gandhi hian an beihnate hi a chhang let duh lo a, Congress tlinna apiangah sorkar rintlak din a tiam a, tun ṭuma assembly inthlan result chuan kum 2019 Lok Sabha inthlanpui neih tura mipuite sukthlek lam tur a hril thui hle tih a sawi.