Congress-in Chhattisgarh CM tur thlang dawn

Chhatisgarh assembly inthlana hnehna changtu, Congress party chuan nizan khan Chief Minister tur thlangin meeting nei.

Nizan dar 8 khan Raipur-ah Congress MLA thlan tharte hian meeting neiin, legislature party hruaitu tur hi an thlang a, vawiinah an puang ang. Inthlan hmaa CM tura hming sawilan zingah Lok Sabha member Tamradhwaj Sahu, state party chief Bhupesh Baghel leh senior leader TS Singh Deo te an tel.

Congress party hian Chattisgarh-a kum 15 zet sorkarna lo chelh tawh, Raman Singh kaihhruai BJP chu chiang taka hnehin sorkar thar a siam dawn a ni. Assembly seat 90 awmah Congress hian seat 68 a la a, rorellai BJP hian seat 15 chauh a la pha. Congress hian vote tla aṭanga 43% hmuin, BJP hian 33% a hmu. Chief Minister hlui Ajit Jogi kaihhruai Janata Congress Chattisgarh chuan seat nga lain, an thawhpui Bahujan Samaj Party (BSP) chuan seat hnih a la bawk.

Congress Legislature Party meeting hi All India Congress Committee observer Mallikarjun Kharge, AICC in-charge of state PL Punia leh senior leader-ten an telpui.