Rajasthan CM tur a la chiang lo

Congress party chuan Rajasthan assembly inthlanah hnehna changin BJP sorkar paihthlak a ni a, Congress kaihhruai sorkar thara Chief Minister atan hian Sachin Pilot nge Ashok Gehlot zawk ruat a nih dawn a la chiang lo. Thutlukna hi party president Rahul Gandhi-an a siam dawn a ni.

Assembly seat 200-a seat 199-ah inthlan hi buatsaih niin, Congress party hi party mala seat la hnem ber a ni a, seat 99 an la. Congress thawhpui Rashtriya Lok Dal (RLD) chuan seat khat lain, an pahniha thawkdun hian seat 100 lain majority an nei pha chiah a ni. Rorellai BJP chuan seat 73 chauh a la pha.

Sorkar thara Chief Minister tur hian Sachin Pilot leh Ashok Gehlot te hming sawirik a ni a, Pilot chuan an party MLA-ten meeting-ah ngaihtuahin, thutlukna chu Congress president leh party hruaitu dangte kutah dah a ni dawn a, an thutlukna siam ang ang chu an pawm dawn tih a sawi.