PM-in hnehna changtu party-te lawmpuina hlan

State assembly panga inthlan result tihchhuaha hnehna changtu party te chu lawmpuina a hlan.

November leh Decem-ber thlaa assembly inthlan neihna state panga - Chhattisgarh, Madhya Pradesh, Mizoram, Rajasthan leh Telangana-ahte PM hi campaign-in a kal nasa hle. Mahse heng state-ahte hian BJP an che ṭha lo hle a, BJP sorkar mekna state pathumah an chak zo lo a ni.

Chhattisgarh leh Rajasthan-ah Congress in hnehna changin sorkar thar an siam dawn a, Madhya Pradesh-ah Congress hian seat hnih chauhin majority a nei pha lo a, mahse BSP puihnain sorkar a siam dawn a ni. Telangana-ah sorkar lai, Telangana Rashtra Samithi (TRS) chu hneh taka thlan tlin nawn leh niin, Mizoram-ah MNF an chak bawk.

Modi chuan Congress Party chu hnehna an chan avanga a lawmpui thu sawiin, Telangana-a TRS chak puitu KCR pawh a lawmpui thu te, Mizoram-a hnehna changtu MNF te a lawmpui thu a sawi.

BJP sorkar tlakna, Chhatisgarh, Madhya Pradesh leh Rajasthan mipuite chu rawng an bawl sak theihna tura hun remchang an pek avanga a lawm thu sawiin, BJP sorkar chuan state mipuite ṭhatna turin theihtawpin a thawk a ni, a ti. Hnehna leh tlawmna chu mihring nuna bet pakhat a ni tih sawiin, state panga inthlan result chuan mipuite rawngbawlsak tur leh India ram hmasawnna tura an thawhna kawngah nasa zawka bei turin a siam dawn a ni, a ti. PM chuan mipuite duhthlanna chu an zahin an pawm tih a sawi bawk.