State panga inthlan result puang

State panga–Chhattisgarh, Madhya Pradesh, Mizoram, Rajasthan leh Telangana state assemby inthlan result chu nimin khan puan a ni a, state lianah BJP-in beisei an phak lo hle a, Congress party an che ṭha thung. Hei hian kum 2019 Lok Sabha inthlanpui neih turah pawh nghawng a neih len hle rin a ni.

Chhattisgarh hian Lok Sabha-ah seat 11 neiin, Madhya Pradesh-in 29, Rajasthan-in 17, Telangana-in17 leh Mizoram-in pakhat a nei.

Nimina inthlan result puanna state panga zingah Telangana-ah chauh rorellai party-in hnehna an chang chhunzawm thei a ni. BJP chuan ro an rel mekna state pathum–Chhattisgarh, Madhya Pradesh leh Rajasthan-ah hnehna an chang zo lo a, Mizoramah rorellai Congress party pawh a chak zo lo bawk.

Chhattisgarh :

Chhattisgarh assembly seat 90-ah Congress party chuan term thum sorkarna siam tawh, BJP chu chiang taka hnehin seat 65 a la a, party malin sorkarin a siam thei dawn a ni. Sorkarna siam tur hian member 46 chin neih a ngai a ni. Kum 2013 inthlana seat 49 la thei, BJP chuan kumin inthlanah seat 17 chauh a la pha a, BSP leh a thawhpuiten seat 7 an la bawk.

Congress party hian inthlan hmasa aiin seat 23 zetin a la hnem a, BJP erawh chuan seat 31 a hum zo lo thung. BSP hian kum 2013-ah seat khat chauh a lak laiin kuminah seat 7 in a pung thung a ni.

Chhattisgarh Chief Minister Raman Singh chuan an chak loh chu an pawm thu leh an chak lohna chhanah mawhphurhna a lak thu a sawi. Nimin tlai khan governor hnenah CM a nihna aṭanga banna a thehlut nghal a ni. Singh chuan BJP chu eptu party ṭha leh ṭangkai tak nih an tum thu a sawi bawk.

Chhattisgarh Congress president Bhupesh Baghel chuan Congress-in hnehna a chang chu democracy tana hnehna ropui tak a ni tih sawiin, BJP chu sum tam tak nen campaign mah se Chattisgarh mipuite chuan an rorelna dik duhin thutlukna dik tak an siam a ni, a ti.

Madhya Pradesh :

Seat 230 awmna Madhya Pradesh-ah rorellai BJP pawhin a thuneihna a hum zo dawn lo niin a lang.

Madhya Pradesh-ah hian BJP leh Congress an inbei tawk hle. Result kimchang hriat hman ni lo mah se, vote chhiar tawh chinah BJP hian seat 108 ah hma hruaiin inthlan hmasa aia an tlakhniamna hi seat 56 a ni. Eptu Congress party leh a thawhpuite chuan seat 114-ah hma hruai mek bawkin, an punna hi seat 55 zet a tling thung. BSP in seat 2 lain, party dangin seat 6 ah hma an hruai bawk.

Madhya Pradesh-ah hian sorkarna siam turin seat 116 neih phak a ngai a ni. Congress party chuan party dangte nena thawkhoa sorkarna siam ngei an tum thu a sawi.

Rajasthan :

Rajasthan-a assembly seat 200 awm zingah bial pakhata candidate chu a thih vangin he biala vote thlak hun hi sawn a ni a, seat 199-ah inthlan hi neih a ni.

Kum 2013 assembly inthlana seat 200-ah 163 la pha, Chief Minister Vasundhara Raje kaihhruai BJP chuan kumin inthlanah seat 74-ah chauh hnehna a chang a, inthlan hmasaa an seat lak zat chu 88 zetin an pha lo. Congress leh a thawhpui party-te chuan bial 100 lain, inthlan hmasa aiin seat 79 in an la tam thung. BSP-in seat 6 lain, party dang leh independent candidate tan seat 20 an la bawk. Sorkarna siam tur hian seat 100 neih phak a ngai a ni.

Rajasthan Chief Minister thar tur ngaihtuahin vawiin hian Congress legilature party chuan Jaipur-ah meeting an nei nghal dawn a, CM tur hi party president Rahul Gandhi an biakrawn hnuah an puang dawn a ni. Legislature party meeting-ah hian AICC general secretary KC Venugopal chuan a telpui ang. CM tura hming sawirik langsar zingah CM hlui Ashok Gehlot leh state Congress chief Sachin Pilot te an tel.

Telangana :

Telangana-ah Chief Minister K. Chandrasekhar Rao kaihhruai rorellai party, Telangana Rashtra Samithi (TRS) chu hneh taka thlan tlin an ni leh.

Seat 119 awmna Telangana Assembly-ah hian TRS chuan seat 87 lain, majority nei tura seat neih ngai zat 60 chu chiang takin a pel a ni.

Congress kaihhruai ṭangrual pawl, Maha Kutami (People's Front) chuan seat 21 a la. Ṭangrual pawlah hian Telugu Desam Party (TDP), Telangana Jana Samithi (TJS) leh Communist Partyof India (CPI) an tel. BJP chuan seat khatah chiah hnehna a chang thung. TRS hian inthlan hmasa aiin seat 22 in a la tam a, Congress kaihhruai ṭangrual pawl hian seat 14 in an la tlem thung. Party tenau dang leh independent candidate-ten seat 10 an la bawk.

KCR chuan an state hmasawnna tura an party agenda leh manifesto-te state mipuiten thlawp a, sorkarna siam chhunzawm thei tura an thlang tling chu lawmawm a tih thu a sawi. State chhunga loneitute hamṭhatna tura theihtawp chhuah zel an tum thu a sawi a, society hrang hrang tihmasawnna turin an thawk zel dawn tih a sawi a ni.

BJP MP Sanjay Kakade chuan Rajasthan leh Chhattisgarh-ah chuan beiseina an nei sang lo sa a, hetihlaia Madhya Pradesh lehzela an party an che chhe lutuk chu ram hmasawnna lam aia khawpui hming thlak leh Ram temple chungchang an buaipui tak vang nia a ngaih thu a sawi. Kakade chuan party hruaituten inthlan neihna tura an hmalakna chu a fel tawk lo niin a sawi a ni.

Congress party hruaitu Shashi Tharoor chuan an party an chet ṭhatna chhan chu party president Rahul Gandhi thawh rah a nih thu sawiin, a campaign nasain a thawk rim hle tih a sawi. Party hruaitu hlun Kapil Sabil pawhin Congress party chet ṭhatna chu Rahul Gandhi, party, worker, mipuite tana hnehna leh thil dik lo an donaa kawnga hnehna ropui tak a nih thu a sawi bawk.