RBI Governor Urjit Patel a bang Shaktikanta Das-an thlak dawn

Reserve Bank of India (RBI) Governor Urjit Patel chu Thawhṭanni khan a bang a, kum 43 chhunga RBI governor nih laia bang hmasa ber a ni. RBI hotu nih laia bang palina a ni bawk.

Urjit Patel chuan a mimal thil vanga bang a nih thu a sawi a, hun eng emaw chen RBI hotu dinhmun chelh theia a awm avangin lawmawm a tih thu a sawi. RBI hotu a nih chhunga RBI staff leh officer ten ṭha taka an thawhpui vang leh an thawhrimna avanga a lawm thu a sawi a, a thawhpui te leh RBI Central Borad-a director-te chu duhsakna a hlan thu a sawi bawk.

Prime Minister Narendra Modi chuan Urjit Patel chu mi thiam leh inpe tak a nih thu sawiin, Reserve Bank of India-ah chuan Deputy Governor leh Governor dinhmun chelha kum ruk a thawh thu a sawi. Hnuhma ropui tak tak a hnutchhiah a, an hre reng dawn tih a sawi a ni. Patel chu economist ṭha leh thiam tak, thil awmdan thlir thiam tak a ni tiin, banking system pawh siamṭhain inkaihhruaina ṭha tak a pe a, a kaihhruaina hnuaiah RBI chuan financial stability a siam thei a ni, a ti.

Patel hian kum 2016, September 4 khan RBI Governor hna hi a chelh ṭan a, kum thum term ni mah se a term zawh hmain a bang ta a ni.

Shaktikanta Das, Economic Affairs Secretary hlui chu RBI Governor thar a nih tur thu nimin tlai khan puan nghal a ni bawk.