India: Covid-19 kai enkawl dam 53% tling Kai hmuh chhuah thar 13,586 an awm

Sorkar laipui chuan nimin khan report an tihchhuahah hri kai enkawl dam rate chu 53% a ni tawh tih an tarlang.

Nimina Ministry of Health and Family Welfare report tihchhuah thlengin mi 2,04,711 chu enkawl dam an ni tawh a, a ṭum khatna atan nimin khan nuai hnih chuang enkawl dam niin darkar 24 chhungin mi 10,386 enkawl dam an awm. 

Enkawl dam lamah hian ram pumah nasa takin hmasawnna awm mah se hripui lengin erawh ziaawm lam a pan hleithei lo thung a, hri kai hmuh chhuah thar 13,586 nimin khan an awm leh a, ram pumah coronavirus kai  3,80,532 an awm tawh a ni. Enkawl dam nuai hnih chuang an awm tawh avangin hri kai mek hi 1,63,248 an la awm.

Thihpui 336 an awm leh a, heti hian hri a len ṭan tirh aṭanga nimin thleng khan India ramah Covid-19 vanga thi 12,573 an awm tawh.

Khawvela hri kai tam ram palina ni mek India rama Covid-19 vanga thi hi 3.30% a ni tawh bawk.

Indian Council of Medical Research (ICMR) chuan ni khatah sample 1,76,959 an test thei tawh a, nitinin an test theih zat hi a pung zel a ni. Hri len ṭantirh aṭanga nimin thleng khan Covid-19 sample 64,26,627 an test tawh.

Ram pumah ICMR pawmpui coronavirus test theihna laboratory 960 a awm tawh a, sorkar laboratory 703 leh private laboratory 257 a awm mek a ni.

Covid-19 kai vanga damdawiina enkawl mek, Delhi health minister Satyendar Jain chuan lung infection a neih hman avangin a dinhmun a ṭha vak lo. A nain zual lam a pan avangin nimin aṭang khan oxygen nena puih a ngai tawh a ni. 

Jain hi Thawhlehni khan Rajiv Gandhi Super Specialty Hospital-ah dah a ni a, Covid-19 test neihsak  nghal niin a tirah a result hi a negative a, mahse darkar 24 hnua test an neih nawn leh hnuah Covid-19 a kai tih hriat a ni. Deputy chief minister Manish Sisodia chuan Ningani aṭang khan Jain-a department chante hi a hmui sak.