Health Minister hoin Covid XE variant chungchang sawiho

Union health minister Mansukh Mandaviya hoin health expert-ten meeting an nei a, Covid-19 variant thar, XE variant chungchang an sawiho. Official-te chu he variant thar kaite chungchang leh vaccine pek chhuah dante chu uluk zawka thlithlai turin a chah.

Health Minister chuan Covid-19 hri kaite enkawlna damdawite chu a tam tawk em tih ennawn fo turin a chah a, vaccine la thei chinte hnena Covid vaccine pek pawh ngawrh taka kalpui chhunzawm zel a ṭul thu a sawi.

Nimina meeting-ah hian Dr VK Paul, Member (Health), NITI Ayog; Rajesh Bhushan, Secretary, Health; Dr Randip Guleria, Director, AIIMS; Dr Balrama Bhargava, Director General, ICMR; Dr. NK Arora, chief of National Technical Advisory Group on Immunisation in India bakah Health Ministry official-te an tel.

Thawhṭanni khan India ramah Covid-19 hri kai thar hi 796 awmin, a zawnin ni hnih chu hri kai thar hi 1,000 hnuai lam an ni tawh. Hri kai mek hi nimin zing dar 8 thleng khan ram pumah mi 10,889 an awm a, hei hi hri kai hmuh chhuah tawh aṭangin 0.03% an ni.

Ram pumah hripui vanga thi hi mi 5,21,710 an awm tawh a, fatality rate hi 1.21% a ni. Covid-19 hri vanga thi zingah mi 1,47,816 hi Maharashtra state ami an ni a, Kerala-ah 68,383, Karnataka-ah 40,057, Tamil Nadu-ah 38,025, Delhi-ah 26,157, Uttar Pradesh-ah 23,499 leh West Bengal-ah 21,200 in an thihpui tawh. Health ministry chuan hripui vanga thi zinga 70% chuang chu natna benvawn nei an nih thu a tarlang.

Delhi-ah hri kai an pung leh
Delhi khawpuia Covid hri kai an pung thar leh a, Thawhṭanni khan positivity rate chu 2.70% ah a kai chho leh. Hei hi thla hnih chhunga positivity rate san ber ṭum a ni.

Chief minister Arvind Kejriwal chuan a kaihhruai sorkar chuan khawpui chhunga hri leng dinhmun chu ngun takin a enfiah reng tih sawiin, chiaina tur a awm lo tih a sawi. A tul a nih chuan hri leng khuahkhirhna turin hma an la leh dawn tih a sawi bawk.

Delhi khawpui hi hri leng lakah an dinhmun a ṭha chho hman tawh hle a, April 4 khan positivity rate pawh 0.5% ah a tla thla hman tawh a ni. Mahse April 12-ah 2.7% ah a kai chho leh a ni.

Mask hmang uar leh turin duh
Healthcare expert-te chuan Covid variant thar a awm leh tak avangin ram pumah face mask vuah pawimawhna sawi uar leh an duh thu an sawi a, hei hi coronavirus variant hrang hrang laka invenna pawimawh tak a ni, an ti.

Kum hnih chhung Covid-19 hri laka invenna khuahkhirhna hrang hrang siamte chu April thla aṭangin sorkar laipui chuan a hlip a, hemi rual hian state ṭhenkhat pawhin face mask vuah tura dan an siamte pawh an thlahdul ve nghal a ni. Maharashtra leh Delhi chuan pawn chhuahna face mask vuah vek tura tih chu a hlip a, hmun dangahte pawh face mask vuah lote pawisa chawitir ṭhin pawh tihtawp a ni bawk.

Mahse Covid variant thar, Omicron sub variant pahnih - BA leh BA.2 infinin an siam, XE variant hmuh chhuah a nih leh avangin ram ṭhenkhatah hri kai an pung leh nasa tawh hle. World Health Organisation (WHO) pawhin XE variant chungchangah warning tichhuakin, Omircon aiin inkaidarh a awlsam zawk a, fimkhur turin mipuite a chah.