Amarnath Yatra 2022 : Mi nuai 7-8 velin J&K an tlawh beisei

Sorkar laipui chuan kumina Amarnath Yatra chu chhinchhiah tlak leh lian ber nia rin a nih thu sawiin, Yatra chhung hian biakzina kal, mi nuai 7-8 velin Jammu and Kashmir an tlawh rin a nih thu ministry of information and broadcasting secretary, Apurva Chand chuan a sawi.

Apurva Chand chuan Jammu and Kashmir chief secretary, divisional commissioner leh deputy commissioner-te pawh meeting a neihpui tawh thu leh, an inbuatsaih dante a sawipui thu a tarlang. Ruahmanna pawh siam fel vek a nih tawh thu leh, khualzin tam tak dawng tura an inpeih thu an sawi a ni, a ti. Kumina Amarnath Yatra neih tur chu chhinchhiah tlak leh hriatreng tur a nih thu an sawi.

Covid-19 hri leng vangin kum 2020 leh 2021 khan Amarnath Yatra hi neih a ni lo a, kuminah chuan June 30 aṭangin neih ṭan a ni dawn a, ni 43 chhung a awh ang. Yatra hmanga kal turte tan Thawhṭanni aṭang khan online registration tih ṭan a ni.