China-in India sipai 10 chhuah
Galwan Valley-a India leh China sipaite inkara buaina a chhuah hnu khan India sipai ṭhenkhat chin hriat lohin an bo nia sawi a nih hnuah, Ningani tlai lam khan China sipai People's Liberation Army chuan India sipai 10 an chhuah.
India sipai 10 an chhuah zingah hian sipai officer pali an tel a, Major pahnih leh Captain pahnih an tel a ni. Heng mite hi Division Commander hoa inbiakna neih a nih hnuah engmah hliam nei loa chhuah zui an ni. A tirah chuan India hian a sipai hren sak an awm lo tih a sawi a, mahse Ningani khan heng sipai 10 te hi chhuah a ni ta a ni.
Buaina chhuah aṭanga ni thumnaah India sipai mi 10 an hrente hi Ningani tlai 5:30 vel khan Galwan Valley-a Patrol Point 14-ah chhuah an ni ta a ni. Kha thil thlengah khan India chuan a sipai 20 an thih thu a tarlang.
Galwan valley-a intihbuaina thlengah khan India sipai zinga 76 in hliam an tuar nia sawi a ni bawk. An zinga 18 chu an hliam na hle a, mi dang 58 erawh chu an ngaihtuah awm lo tih Indian army thuchhuah chuan a tarlang bawk.
Kum 1996 November thla khan India leh China chuan inremna pakhat, LAC-a kilometre 2 huam china silai hmanga inkah theih lohna inremna an ziak a, hei vang hian Thawhṭanni zana buaina chhuakah khan silai hmehpuah a ni lo.