Kerala-in Covid hri kai hmuh chhuah puangzar tawh lo

Kerala sorkar chuan Thawhlehni aṭang khan nitina Covid hri kai hmuh chhuah thar a puanzar ṭhin chu a titawp.

State health minister office chuan state chhungah hri kai thar an tlakhniam zel avangin Covid daily update hi tihtawp a ni tih a sawi.

Kum 2020, January 30 khan India ramah Covid-19 hri kai hmasa ber chu hmuh chhuah niin, hei hi Kerala mi medical zirlai, China aṭanga rawn haw a ni. Hemi ni aṭang hian Kerala sorkar chuan nitin an state-a hri kai thar leh sample test zat chu mipuite hmuh theih turin a puangzar ṭhin. Kum hnih leh thla hnih chuang nitin data hi update a nih hnuah tihtawp a tum ta a ni.

Covid update tihtawp chungchangah doctor-te ngaihdan erawh a in ang lo. Indian Medical Association (IMA) state president Dr N Sulphi chuan, khawsak phung pangngaia an awm a hun tawh a, daily update tihtawp pawh chu a hun tawh nia a ngaih thu a sawi. Hemi rual hian Covid hri vanga ICU-a dah luh leh thihpui awmte chu health department lamin uluk taka an chhuizui zel a ṭul niin a sawi.

Immunologist leh rheumatologist, Dr Padmanabha Shenoy erawh chuan nitina hri kai thar zat puanzar a nih loh pawhin, sorkar chuan kartin emaw, thla tin emawin Covid data update chu mipuite hriat tura a tihchhuah a duh thu a sawi thung. Dr Shenoy chuan, "Covid hi a la bo lo. UK dinhmunte kan hmu a, hri kai an pun chho leh dante kan hria a ni. Health department chuan hri leng dinhmun hi uluk taka a thlithlai reng a, kar tin emaw, thla tin emaw data an tichhuah a ngai a ni. Hei hi Covid hri dona kawnga thil pawimawh tak a ni tel a, fimkhurna hi invenna ṭha ber a ni," a ti.

Doctor tam zawk chuan Covid khuahkhirhna te hlih a ni tawh a, tunah nitin hri kai thar zat puanzar a nih tawh loh chuan mipui an inthlahdah zual ang a, Covid hri chu a bo tawh angah an ngaih mai a hlauhthawn thu an sawi bawk.