DGCA-in SpiceJet pilot 90-te Boeing thlawhtheihna khalh a khap

Indian aviation regulator, Directorate General of Civil Aviation (DGCA) chuan Spicejet pilot 90-te chu training an neih ṭhat tawk loh avangin Boeing 737 Max thlawhtheihna an khalh a khap.

DCGA hotu Arun Kumar chuan thuchhuah siamin, " Heng pilot 90-te hi Max an khalh phalsak a ni lo a, he thlawhtheihna khalh tur chuan training hlawhtling taka an neih leh phawt a ngai ang," a ti. Thupek zawm lo an awm chuan na taka action lak a nih tur thu a sawi bawk.

Ethiopia khawpui, Addis Ababa bula Ethiopian Airlines 737 Max aircraft chetsuala mi 157 thihna a thlen aṭanga ni thum hnu, kum 2019 March 13 khan DCGA chuan Boeing 737 Max thlawhtheihnate hi thlawhchhuah phal loin a dintir a ni. He thlawhtheihna chesuala thi zingah hian India mi pali an tel. Boeing lamin aircraft software-te an siamṭhat hnuah, nikum August thla khan DCGA chuan hremna hi a hlip a ni.

Spicejet hian Boeing 737 Max-ah pilot 650 a training tir tawh a, tunah hian Max aircraft 11 service tirin hemi atan hian pilot 144 an ngai tih an thupuangtu chuan a sawi. "Max-a pilot train 659 zinga 560 chu chhawr theihin an la awm a, hei hi tuna kan mamawh zat ai pawhin an la tam a ni," tiin harsatna engmah an neih phah dawn loh thu a sawi.

Indian airline zingah SpiceJet chauh hi Max aircraft nei tel a ni. Airline thar, Akaka Air chuan nikum khan Max thlawhtheihna 72 lei tur hian Boeing chu inremna an ziahpui tawh a, mahse thlawhtheihna hi an la dawng lo a ni.