Amnesty International thubuai bawhzui turin Sorkar laipuiin CBI hnenah phalna a pe

Sorkar laipui chuan Amnesty International leh he pawl chairman, Aakar Patel te thubuai bawhzui turin Central Bureau of Investigation (CBI) chu phalna a pe.

Foreign Contribution Regulation Act hnuaiah, association-te chu Ministry of Home Affairs-in phalna a pek loh chuan an thubuai bawhzui theih a ni lo.

CBI chuan ni hnih liam taah khan phalna hi an hmu tih nimin khan sawiin, court-ah pawh chargesheet an thehluh thu leh, thubuai pawh ngaihtuah ṭan theih a ni thu an sawi.

Kar liam ta Zirtawpni khan CBI court chuan Amnesty International India chief Aakar Patel chu a phalna lo chuan India ram chhuahsan lo turin a lo hriattir tawh a, hemi rual hian Delhi Court-in Patel chungchanga Look Out Circular (LOC) a tihchhuah avanga ngaihdam dil tura CBI director ngaihdam dil tura a hriattirna pawh a 'stay' sak nghal bawk.

CBI chuan Amnesty International leh Patel-te hi FCRA rules bawhchhiaah puh kum 2021, December 31 khan special CBI Court-ah an lakah thubuai ziahluh an ni. Kum 2018, October thla khan Bengaluru-a Amnesty India hmun chu Enforcement Directorate (EC) lamin an lo dap tawh bawk. Kum 2019, November thla khan Amnesty International India Pvt. Ltd (AIIPL), Indians For Amnesty International Trust, Amnesty International India Foundation Trust, Amnesty International South Asia Foundation leh pawl dangte lakah thubuai ziahluh a ni leh a ni.

Amnesty hi FCRA rules bawhchhiaa foreign funding a dawn theihna tura commercial arm, Amnesty International India Pvt Ltd dinah puh a ni. Mahse an pawl chuan he puhna hi thu dik lo a nih thu an sawi thung.