India ramah Covid-19 vangin mi 5,21,743 an thi tawh

India ramah Ningani khan Covid-19 hri vangin mi paruk an thih belh leh a, heng mite nen hian ram pumah hripui vanga thi hi mi 5,21,743 an tling tawh a ni.

Ningani khan ram pumah hri kai thar mi 949 awmin, hri kai hmuh chhuah tawh hi mi 4,30,39,972 an ni tawh. An zinga 4,25,07,038 chu enkawl dam an ni tawh a, nimin zing dar 8 thleng khan India ramah Covid-19 hri kai mek, active case hi 11,191 an awm. Hri kai mek hi hri kai tawh aṭangin 0.03% an ni a; hri kai enkawl dam, recovery rate hi 98.76% a ni tawh thung.

Delhi-ah hri kai pung thar leh
Covid-19 hri lengin ziaawm lam pan a, hri kai an tlahniam zel hnuah Delhi khawpuiah hri kai hmuh chhuah thar hi an pung chho leh ṭan.

Ningani khan Delhi-ah hian hri kai thar 325 an awm a, daily positivity rate pawh 2.39% ah a kai chho leh a, hei hi March 3 hnuah a san ber ṭum a ni. Kar khat chhungin hri kai, in lama inenkawl, home isolation pawh 48% dawnin an pung leh tawh bawk.

Delhi education department chuan school-te tan kaihhruaina thar tichhuakin, an school-ah Covid hri kai thar awm zat chu Department-ah hriattir zel turin a ti a, hri kai an awm chuan school chu khar turin a ti bawk.

Sorkar pawhin school tinte zawm tur kaihhruaina pali tichhuak lehin, zirlai leh zirtirtute chu school-ah mask vuah vek tur te, social distancing dan zawm ṭha tur te, kut sil ngun tur leh Covid-19 hri laka invennate inzirtir thar leh turin a ti. Ghaizabad leh Noida-ah chuan zirlai leh zirtirtu zingah hri kai thar an awm avangin ni hnih liam ta aṭang khan school pathum khar a ni tawh a, class pawh online hmangin an kal chhunzawm leh a ni.

Doctor-te chuan hri kai pung leh mah se, hri kai hmuh chhuah hi an la tlem a, chiaina tur a awm lo tih an sawi a, hemi rual hian mipuite chu fimkhur chhunzawm zel turin an chah.