RBI governor tharin sawizui hlawh

Reserve Bank of India (RBI) governor aṭangin Urjit Patel chu December 10 khan a bang a, a thlaktu atan Shaktikanta Das chu kum nga term atan ruat nghal niin, Thawhlehni khan a hna thar hi a zawm a, RBI governor 25-na a ni.

RBI governor thar Shaktinkanta Das hi IAS officer (rtd) niin Economic Affairs secretary hlui a ni a, thiamna lamah MA (History) niin, Delhi University chhuak a ni. Das hmaa RBI governor dinhmun lo chelhtu, Urjit Patel leh Raghuram Rajan te chu economist ṭha leh lar tak an nih avangin, sorkarin RBI governor atana non-economist a dah hian sawizui a hlawh hle. Eptu party lam pawhin sorkar beihna remchangah an hmang zui nghal bawk.

IAS officer zinga RBI governor atana dah hnuhnun ber chu D Subbarao a ni a, mahse a ni pawh hi ecnomist tho a ni. Non-economist zingah RBI governor hna chelh hnuhnung ber chu kum 1990-a ruat, S Venkitaraman kha a ni.

RBI governor atana ruat turah hian fixed eligibility criteria awm hran lo mah se, central bank hotu lu ber tur atan hian economist dah beisei a ni ṭhin. Kum 1935 khan RBI governor hmasa ber atan professional banker Osborne Smith ruat a ni a, a hnua he dinhmun chelhtute hi kum 1970 chho thleng khan ICS (Indian Civil Service) bureaucrat-te an ni thung. Kum 1977 aṭang khan kalphung nasa taka thlakin, RBI hotu atan hian economist te ruat chhoh an ni ṭan a, hemi chhung hian retired IAS officer pali chu ruat tel an la ni a, mahse an zinga pathum chu economist tho a ni.

Shaktikanta Das hi Tamil Nadu cadre IAS officer a ni a, central-a BJP sorkar nen inzawmna ṭha neia sawi niin, kum 2016-a PM Modi-an pawisa note lian pahnih a tih thih chungchangah pawh khan a phusa hle. Hetihlai laia RBI Governor Patel chuan demonetisation chungchangah aw a chhuah duh loh laiin, Das hi sorkar aiawha thu puangtu berah ṭangin, committee pawh a ko fo a ni. Das hi bank-a pawisa note hlui thlentuten a ngai an thlen nawn tur venna atan an kutzungṭanga pentui rehthei lo hnawihsak rawttu a ni, mahse hei hian sawisel a hlawh nasat vangin sut leh a ni ta zawk a ni.

Urjit Patel-an Thawhṭanni-a RBI governor aṭanga a ban thu a sawi khan a mimal thil vang niin a sawi a, mahse a banna chhan tak hi hun eng emaw chen aṭanga sorkar laipui leh central bank inkara inremlohna lo awm tawh vang nia ngaih a ni. Modi-a kaihhruai sorkar hian central bank hi sum puktir dan kalphung leh a policy dangte pawh thlahdul tir tumin hun rei tak a nawr tawh a, hei hi RBI lam hian an thlawp thei lo a ni. International Monetary Fund (IMF) chief economist Maurice Obstfeld pawhin sorkar laipui chu financial stability kalpui a tumnaah RBI hmalakna chu ngai pawimawh a, politician-te inrawlh lo tura a duh thu a lo sawichhuak hial a ni. November thla khan Urjit Patel hian PM Modi chu meeting neihpuiin, central bank leh Prime Minister Office inkara inhriatthiam lohna hrang hrangte pawh an sawidun an ni.

Eptu party-te chuan Urjit Patel-a ban leh, amah thlaktu atana economist ni lo ruat a nih chungchangah BJP kaihhruai NDA sorkar chu na takin an bei zui nghal a ni. Prime Minister hlui leh economist, Manmohan Singh chuan Urjit Patel-a bang chu ram economy tan thil pawi tak a nih thu a sawi a, Indian economy in hun harsa tak a hmachhawn chhoh mek laia a bang chu a vanduaithlakin, ram economy thlenga pawi tur a ni, a ti.