Congress President hoin CM thar tur ngaihtuah

Congress Party president Rahul Gandhi hoin nimin khan party hruaitu lawkte chuan Madhya Pradesh, Rajasthan leh Chhattisgarh-a Congress sorkar thara chief minister turte an ngaihtuah.

Thawhlehni khan state pathuma Congress legislature party chuan meeting neiin, Congress MLA thlan tharte chuan chief minister ruat chungchanga thutlukna hi party president Rahul Gandhia-a siam turah an dah a ni.

Nimin khan party president Rahul Gandhi hoin Delhi-ah party hruaituten CM turte hi an ngaihtuah a, thutlukna an siam mai thei lo a ni. He meeting-ah hian party senior leader te an tel a, Sonia Gandhi leh Rahul-a farnu Priyanka Gandhi pawh a tel bawk.

Congress sorkar thar dinna tur state pathumah hian party MLA-ten CM tura an duhte a inang lo a, hei vang hian thuneitu sang lam pawhin thutlukna an siam mai thei lo a ni.

Rajasthan-ah chuan chief minister ṭum hnih lo ni tawh Ashok Gehlot leh state Congress hotu Sachin Pilot-te buk an ni a, Ashok Gehlot hi CM atan hian ruatfel ni tawh a sawi mah se he chanchin ziah lai hian official-a puan a la ni lo.

Madhya Pradesh-ah pawh kum 72 mi Kamal Nath chu CM atan hian ruat nia sawi a ni bawk a, hei pawh hi official thuchhuah hriat hman a ni lo bawk. Kamal Nath leh Jyotiraditya Scindia-te chuan CM dihmun hi an inchuh a, Scindia hi deputy chief minister tan dah tum nia sawi a ni a, mahse hei hi a pawm dawn leh dawn loh hriat a la ni lo bawk.

Chhattigarh chief minister tura hming sawilan zingah All India Congress Committee OBC cell chairman Tamradhwaj Sahu bakah Bhupesh Bhagel, TS Singh Deo te chu a langsar zual an ni.