PM-in Rs vbc 22,000 hu project hrang hrang lungphum phum dawn

Prime minister Narendra Modi chuan vawiin hian ni thum cham turin Gujarat a tlawh dawn a, a cham chhungin project hrang hrang Rs vaibelchhe 22,000 hu lungphum a phum ang.

Kumina state panga assembly inthlana state pali-a BJP-in hnehna an chan hnuah, tun ṭum hi PM-in Gujarat a tlawh vawi hnihna tur a ni. Gujarat assembly inthlan hi kumin kumtawp lamah neih a ni dawn a ni.

Vawiinah Modi hian Gandhingar-a Command and Control Centre (CCC) a tlawh dawn a, naktuk zingah Banaskantha District Cooperative Milk Producers' Union Ltd, Banas Dairy tia hriat lar campus sakna tur lungphum a phum ang. Naktuk tlai lamah Jamnagar-a World Health Organisation-in Global Centre for Traditional Medicine a siamna tur lungphum a phum dawn a, WHO director-general nen an inkawm nghal bawk ang.

Gandhinagar-a Mahatma Mandir Convention and Exhibition Centre-a Global AYUSH Investment & Innovation Summit 2022 chu PM hian a hmanpui dawn bawk a, summit zawhah Mauritius prime minister nen an inkawm dawn a ni.

Gujarat-ah hian kum 27 chhung BJP hian thuneihna an chang tawh a, state assembly inthlan hnuhnung berah khan Congress party chuan ṭum dang aia hma sawnin, assembly seat 182 awmnaah seat 77 lain, an vote hmuh zat hi 41.4% a tling. Hei hi kum 32 chhunga Gujarat-a Congress party an chet ṭhat ber ṭum a ni. BJP chuan inthlan neih tur thlirin, nikum September thla minister zawng zawng bakah chief minister thlengin an thlak vek a ni.