Sorkar inthlahdah vangin mi nuai 40 chuang Covid vangin an thi : Rahul Gandhi

Congress party hruaitu Rahul Gandhi chuan Covid-19 hri len laia sorkar laipui inthlahdah vangin India mi nuai 40 an thih phah tih sawiin, heng mitthi chhungte hi zangnadawmna Rs nuai li ṭheuh pek vek turin sorkar a phut bawk.

Rahul Gandhi chuan New York Tiems report a screenshot chu a twitter-ah a tarlang a, he report-ah hian WHO-in khawvel puma Covid vanga thi zat puanzarna tura a hmalakna chu India-in a tibahlah niin a sawi a ni.

"Modi hian thudik a sawi loh bakah, midangte pawh ṭawngchhuah a phalsak lo bawk. Tun thlengin oxygen indaih loh vangin thi an awm lo tiin dawtin a la ṭang chhunzawm reng a ni," tiin Gandhi chuan a sawi.

Congress party chuan BJP sorkar chu India rama Covid-19 vanga thi zat dik tak puangzar duh lohah an puang a, hripui vanga thi chhungte hi zangnadawmna, Rs nuai li pek turin an phut a ni.