Delhi-a Hanuman Jayanti Rally neihnaah intibuai

Delhi-a Jahangirpuri area-ah Inrinni khan Hanunam Jayanti rally neihnaah buaina a chhuak a, mi pakua in hliam an tuar. Hliam tuarte hi police mi pariat leh civil mi pakhat an ni.

Police-te chuan buaina chhuak kaihhnawihah hian mi 14 an man tawh a, CCTV footage leh social media lama video darh aṭangin buaina chhuaka inhnamhnawih dangte pawh chhui mek an nih thu an sawi.

Deputy Commissioner of Police (Northwest) Usha Rangnani chuan Indian Penal Code (IPC) hnuaia sections 307 (attempt to murder), 120 B (criminal conspiracy), 147 (rioting) leh Arms Act hnuaiah thbuai ziahluh a nih tih a sawi. Hliam tuarte chu damdawi-inah enkawl mek an nih thu leh, an zinga pakhat sub-inpector chu silaia kah fuh a nih thu a sawi bawk.

Delhi-a buaina chhuahna hmunah hian venhimna khauh taka kalpui nghal a ni a, Uttar Pradesh lam pawh buaina chhuak thei laka fimkhur tura hriattir nghal niin, Meerut, Lucknow leh Noida-ah pawh venhimna tihkhauh a ni nghal bawk a ni.

Union home minister Amit Shah chuan Inrinni khan buaina chhuak chungchangah Delhi Police Commissioner Rakesh Asthana and Special Commissioner of Police (Law and Order) Depender Pathak chu be nghalin, dan leh thupek khauh taka kengkawh turin a hrilh.