SC-in Rafale deal chhuichiang tura ngenna a hnawl

Supreme Court chuan sorkar laipui leh France-in Rafale fighter jet leina tura inremna an siam dan chhuichiang tura ngenna a hnawl.

Court chuan Rafale deal siam danah sumdawng duhsak bik neia sawina chu a finfiahna a hmuh loh thu a sawi a, court tana lo inrawlh vena chhan tur an hmu lo tih a sawi. Hei bakah hian fighter jet leina man zat tur kimchang puanzar an phutna pawh court lam lo buaipui tur a ni lo a, hei chu thuruk a ni tur a ni, a ti.

Sorkar chuan Indian Air Force (IAF) hman turin France firm Dassault chu Rafale fighter jet 36 leina turin cheng vaibelchhe 59,000 inremna a siampui a ni. Mahse inremna siam a nih danah Prime Minister Narendra Modi leh a kaihhruai sorkar chuan thil dik tawk lo an ti nia sawiin Congress party leh eptu party dangten an bei fo a, court enpuina hnuaia inremna siam dan hi chhuichiang phutin petition eng emaw zat thehluh a ni. Petition thehluttu zingah hian activist leh lawyer Prashant Bhusan, union minister hlui Arun Shourie leh Yashwant Sinha, Aam Aadmi Party MP Sanjay Singh leh advocate ML Sharma leh Vineet Dhanda te an tel.

Nimina Supreme Court-in Rafale deal petition chungchanga thutlukna a siam hnu hian political party-te chu an inbei chhunzawm nghal. BJP chuan Rafale chungchang chu Congress party chuan an sawi chhunzawm zel thei a, hemi rual hian Supreme Court thutlukna pawh hi an sawilang tel zel tur a ni tiin an tiel zui nghal. BJP President Amit Shah chuan Rahul Gandhi chuan he inremna siam chungchangah dik lo takin puh ṭhin mah se, ram mipuite chuan Prime Minister Narendra Modi leh a kaihhruai sorkar an la ringtawk reng a ni, a ti. Congress chu an suangtuahna ramah, thutak awm lohaah an cheng a ni tiin, thil dik lo finfiahna an nei a nih chuan court sang ber hmaah chuan an thlen mai tur a ni, a ti bawk.

Hetih lai hian central-a BJP thawhpui, Shiv Sena chuan Rafale deal chungchang chu Supreme Court-ah ni loin, Parliament-ah chinfel a ni zawk dawn tih a sawi. Party hruaitu Sanjay Raut chuan fighter jet man chungchangah court-in a ngaihtuah tur ni lo tia a sawi laiin, an hna tur ni loa Ram Temple sak chungchang erawh a ngaihtuah thung si, tiin a sawi.

Petition thehluttu zinga mi Prashant Bhushan pawhin Supreme Court thutlukna siam chu a dik lo nia an ngaih thu sawiin, an campaign chhunzawm zel dawn a, a ṭul chuan review petition pawh an la thehlut leh dawn niin a sawi bawk. Congress hruaitu Mallikarjun Kharge pawhin Rafale deal chungchang chhui tura Joint Parliamentary Committee din an phutna chu a ding reng tih a sawi bawk a ni.