Rajasthan CM atan Ashok Gehlot ruat

Congress party president Rahul Gandhi ho-a Rajasthan chief minister thar tur ngaihtuaha hun rei tak meeting neih a nih hnuah senior leader Ashok Gehlot chu Chief Minister atan ruat a nih thu an puang. Deputy Chief Minister-ah Sachin Pilot dah a ni dawn bawk.

Party hruaitute chuan Rajasthan CM atan hian Ashok Gehlot nge Rajasthan Congress chief Sachin Pilot dah zawk tur tihah thutlukna an siam mai thei lo a, meeting pawh ṭum eng emaw zat an neih phah a ni. CM thar tur puan hun tihkhawtlai zel a nih vang hian party worker ṭhenkhat an lungawi lo hman nia sawi a ni a, mahse hei hi thu dik lo a nih thu Ashok Gehlot chuan sawiin, BJP te dawt thu thehdarh zawk a ni, a ti.

Party president hoa meeting-in CM thar tur an ruat fel hnuah, nimin tlai khan Rajasthan Congress party chuan press meet buatsaihin, Ashok Gehlot chu CM atana ruat a nih thu hi an puang ta a ni. Sachin Pilot chu deputy chief minister niin, Rajasthan Congress hotu a ni chhunzawm dawn bawk a ni.