Dec 17-ah MP CM atan Kamal Nath lalut dawn

Congress senior leader Kamal Nath chu December 17 hian Madhya Pradesh chief minister atan lakluh a ni dawn ta.

CM thar lakluh inkhawm hi chawhnu dar 1.30-ah Raj Bhavan kawt, Lal Parade Ground-ah lakluh a ni ang.

Madhya Pradesh assembly inthlan neih zawh takah Congress party hi party mala seat la hnem ber niin, asesmbly seat 230 awmah seat 114 a la a ni. Sorkarna siam tura seat neih ngai zat, seat 116 chu seat hnihin a pha lo a, mahse BSP MLA 2, SP MLA 1 leh independent MLA pali-ten Congress hi an thlawp avangin Congress kaihhruai sorkar a ding dawn ta a ni.

Congress sorkar thara chief minister tur hian senior leader Kamal Nath leh Jyotiraditya Scindia chu buk an ni a, party president Rahul Gandhi hoin party hruaitu lawkten Ningani khan an ngaihtuah a ni. Hun rei tak buk tawn niin thutlukna pawh an siam mai thei lo a, Ningani zan tlai tawh takah Kamal Nath zawk hi chief minister tur hian ruat a nih thu an puang thei chauh a ni.

Kamal Nath hi kum 1946, November 18-a piang niin, Manmohan Singh-a prime minister-na hnuaiah union minister pawh a lo ni tawh a ni. Lok Sabha-ah member ni rei thei ber zinga mi a ni bawk a, 16th Lok Sabha-ah khan Pro Tem Speaker atan ruat a ni. Kumin May thla khan Madhya Pradesh Congress Committee president atan thlan niin, a kaihhruaina hnuaiah hian an party hian November 28-a assembly inthlan kha an hmachhawn a, rorellai BJP an paihthla a ni.