Vawiin-ah Congress CM thar pathum lalut dawn

Congress sorkar thar dinna tur - Chhattisgarh, Madhya Pradesh leh Rajasthan-a chief minister thar turte chu vawiin hian rinawmna thu tiamtira lakluh an ni dawn. CM thar lakluh inkhawm zawng zawng hi party president Rahul Gandhi chuan telpui vek a tum a ni.

Rajasthan : Vawiin chawhma dar 10 hian Congress senior leader Ashok Gehlot chu Rajasthan Chief Minister atan lakluh a ni dawn. CM thar lakluh inkhawm hi Jaipur-a Albert Hall Museum tualzawlah neih a ni dawn a, CM rual hian deputy chief minister atan hian state Congress chief Sachin Pilot lakluh a ni dawn bawk a ni.

CM lakluh inkhawm hi Congress party president Rahul Gandhi leh prime minister hlui Mamohan Singh-ten an hmanpui dawn a, non-BJP party hrang hrang hruaitute pawhin an telpui dawn bawk a ni. Janata Dal (Secular) chief leh prime minister hlui HD Deve Gowda, Loktantrik Janata Dal leader Sharad Yadav, National Conference hotu Farooq Abdullah leh Telugu Desam Party hotu leh Andhra Pradesh chief minister N Chandrababu Naidu-te pawh an tel dawn a ni. Anni baka hian Rastriya Janata Dal hotu Tejashwi Yadav, DMK hruaitu MK Stalin leh Kanimozhi, Jharkhand Mukti Morcha hotu Heman Soren, Janata Vikas Morcha hruaitu Babulal Marandi bakah All India United Democratic Front leader Badruddin Ajmal-te pawh tel tur zingah sawi an ni.

Congress party hian Rajasthan-a assembly seat 200-a inthlan neihna, seat 199-ah seat 99 lain BJP-in seat 73 an la ni.

Madhya Pradesh : MP term kua lo ni tawh leh Madhya Pradesh state congress unit president nilai, Kamal Nath chu vawiin chawhnu dar 1.30 hian Bhopal-a Jamboree Maidan-ah Madhya Pradesh Chief Minister atan lakluh a ni dawn. A tirah chuan CM lakluh inkhawm hi Lal Parade ground-a neih tura ruahman a ni a, mahse mipui tam tak an len theihna turin a hmun hi sawn a ni leh ta tih party thuchhuah chuan a sawi.

Kamal Nath hi kum 15 hnuah Madhya Pradesh-a Congress sorkara chief minister ni leh thei hmasa ber a ni dawn a ni. Congress CM hnuhnung br chu Digvijaya Singh niin, kum 2003 khan BJP chuan Congress hnehin thuneihna an chang a, a zawnin term thum an sorkar zui a ni.

Vawiin hian CM chauh hi lakluh a ni hrih ang. Kamal Nath hian UPA chairperson Sonia Gandhi leh party president Rahul Gandhi, West Bengal Chief Minister Mamata Banerjee, Andhra Pradesh Chief Minister Chandrababu Naidu, BSP hotu Mayawati leh SP president Akhileh Yadav-te a sawm a, anni bakah Congress sorkarna state chief minister-te sawm vek an ni bawk.

Congress hian Assembly seat 230 awmah seat 114 a la a, majority neih ngai zat seat 116 chu seat hnihin a pha lo a, mahse BSP MLA 2, SP 1 leh independent MLA pali-ten an thlawp a ni.

Chhattisgarh : Chhattisgarh Chief Minister atan state Congress chief Bhupesh Baghel chu vawiin tlai 4:30 hian lakluh a ni dawn. Lakluh inkhawm hi state khawpui, Raipur-a Science College ground-ah neih a ni dawn a, Governor Anandiben Patel-an rinawmna thu a tiamtir dawn a ni. Vawiin hian CM chauh lakluh a ni dawn a, a cabinet turte chu a hnuah a la ruat dawn chauh a ni. Lakluh inkhawm hi Congress hruaituten an telpui dawn bakah, non-BJP party hruaitute sawm an ni bawk.