Congress-in Chhattisgarh CM tur puang

Congress party chuan Chhattisgarh Chief Minister atan state Congress chief Bhupesh Baghel a ruat ta.

Party hruaitute chuan hun rei tak chief minister tur an ngaihtuah hnu hian, assembly inthlan neih zawh taka rorellai BJP hneh taka hneh theih tura Congress hruaitu Baghel chu ruat a ni ta tih nimin khan a puang ta a ni.

Chhattisgarh assembly inthlan neih zawh takah khan Congress party hian term thum sorkar siam tawh, rorellai BJP chu chiang taka hnehin, assembly seat awmah seat 68 an la a, BJP hian seat 15 chiah a la pha thung. Hnehna an chan hnuah Congress sorkara chief minister tur hian assembly-a Leader of Opposition Congress hruaitu hlun TS Sing Deo leh state Congress chief Bhupesh Banghel-te bakah, hruaitu dang Tamradhwaj Sahu leh Charan Das Mahant te hming sawirik a ni.

Party president Rahul Gandhi hoin senior leader-ten Chhattisgarh CM thar tur hi an ngaihtuah a, thutlukna siam mai thei loin hun rei tak an sawiho a ni.

Chief Minister thar tur Bhupesh Baghel hi kum 1961, August 23-ah a pianga, loneitu chhungkua an ni. Kum 1985-ah Indian Youth Congress zawmin 1990-1994 chhung khan IYC Durg District president a ni a, 1994-95-ah Madhya Pradesh Congress vice president a ni. Kum 1998 khan Madhya Pradesh chief minister Digvijay Singh kaihhruai Congress sorkarah minister of state-ah dah a ni a, 2000-ah MP State Road Transport Corporation chairman -ah ruat a ni. Kum 2000 November thlaa Chhattisgarh state din a nih khan Chhattisgarh Legislative Assembly member niin Revenue, Public Health Engineering and relief work minister hmasa ber a ni a, he dinhmun hi kum 2003 thleng khan a chelh.

Kum 2013 inthlanah an party hi an chak zo lo a, kum 2003-2008 chhung khan assembly-ah deputy leader of opposition in a awm. Kum 2008 leh 2013 assembly inthlanah pawh BJP an hneh zo lo a, kumin inthlanah chiang takin an lehthal ta thung a ni.

Chhattisgarh CM thar hi vawiin tlaiah rinawmna thu tiamtira lakluh a ni dawn a, he hun hi central lama party hruaitute pawhin an telpui dawn a ni.