1984 Anti-Sikh Riot case : Sajjan Kumar damchhung tang turin hrem

Delhi Court chuan nimin khan Congress party hruaitu Sajjan Kumar chu kum 1984-a Sikh hnam tualvuakna thleng chungchang thubuaiah thiam loh chantirin damchhung tang turin a hrem.

Kum 73 mi, Sajjan Kumar hi Delhi-a Raj Nagar-a chhungkaw khata member panga thah an nihna thubuaiah thiam loh chantir a ni. Court chuan Delhi khawpui chhuahsan lo tura hriattir nghalin, December 31-ah thuneitute kuta inpe turin a hriattir a ni.

High Court chuan harsatna hrang hrang awm mah se, he pawikhawihna thleng tuartute hnenah a tawpah chuan thudik tak a dingchang ṭhin tih hi hriattir a pawimawh a ni, a ti. Pawikhawihna thlentu zing mi, Sajjan Kumar leh midangte lakah thudik hailan a nih theihna atana huaisen taka beitu, kut tuartu zinga mi Jagdish Kaur huaisenna chu sawiin, he thil thleng hian tun thlengin nghawng a la nei a ni, tiin court chuan a sawi.

Kum 1984 khan hetih hunlaia prime minister Indira Gandhi chu a Sikh bodyguard-ten an kaphlum a, hemi hnu hian mipui thinrimin Sikh hnam chu an pawng beih a, mi 3,000 zetin an thihphah a ni.

Pawikhawihna thleng tuartu leh mita hmutu tam tak chuan Sikh hnam beitute hi Congress hruaitu ṭhenkhatin an ho tih an sawi. Party hruaitu lawk zingah Sajjan Kumar hi thiam loh chantir hmasa ber a ni.

Trial court chuan anti-Sikh riot case-ah hian Congress councillor hlui Balwan Khokhar, retired naval officer Officer Bhamal leh midang pathumte chu thiam loh a lo chantir tawh a, Sajjan Kumar hi a thiam a chantir thung a ni. Mahse Central Bureau of Investigation (CBI) chuan Kumar ngaihdam a nihna hi an khing let a, hemi hnu hian Delhi Court chuan trial court thutlukna hi hnawlin, Kumar-a thubuai hi ngaihtuah ṭhat leh a ni.

Congress party chuan Sajjan Kumar thiam loh chantir a nih chungchang chu politics khelhna hmanruaa hmang lo turin an duh thu a sawi nghal. Congress senior leader Abhishek Manu Singhvi chuan dan chuan dik takin ro a rel mai dawn a, he thil hi politics nena sawi zawm tur a nih loh thu a sawi a, eng party mahin he thil atang hian hlawkna lo hmuh an tum tur a ni lo, a ti. Senior leader Kapil Sibal pawhin court chuan dan ang takin ro a rel a, politics nena sawizawm tur a ni lo, a ti. Punjab Pradesh Congress Committee president Sunil Kumar Jakhar chuan Sikh hnam tualvuakna thlenga inhnamhnawihte chu tupawh ni se, an phu ang zela hremna pek chu party duhdan a ni tih sawiin, rorelna dik thlen tur hian nghah rei ngai mah se a tawpah chuan a langchhuak ta tih a sawi. Tumah dan chunga leng an awm lo tih a sawi bawk.