BJP-in West Bengal sorkar khin a tum

Bharatiya Janata Party (BJP) chuan 'rath yatra' huaihawt an tumah West Bengal sorkarin phalna a pek duh loh vangin court sang zawkah state sorkar khin a tum tih a sawi. Hei bakah hian lungawi lohna lantir an tum tih a sawi bawk.

BJP state president Dilip Ghosh chuan party hruaitute chuan hma an lak zel dan tur ngaihtuahin Pathianni khan national general secretary Bhupender Yadav leh hruaitu dangte meeting an neihpui tih a sawi.

Ghosh chuan PTI hnenah, " State sorkar thiltih dan hi court sang zawkah khin kan tum a ni. Engvangin nge state sorkar hian political programme kan neih tur atan phalna min pek duh loh? State pum huapin lungawi lohna lantir kan tum bawk a, Governor KN Tripathi pawh hmuin Trinamool Congress sorkar lakah complaint kan thehlut dawn bawk a ni", tiin a hrilh.

West Bengal Chief Minister Mamata Banerjee-i kaihhruai TMC sorkar chuan kar kalta Inrinni-a BJP-in rath yatra neih an tum chu buaina a chhuah palh venthawn thilah phalna a pe duh lo a ni.