Rafale deal vangin RS inkhawm titawp

Nimina Rajya Sabha rorel inkhawm chu Rafale jet deal leh Cauvery chungchangah member-te an inauhbuai leh avangin titawp a ni. Ni nga chhung rorel mumal thei loin an awm tawh a ni.

Rorel inkhawm ṭan a nih veleh Tamil Nadu party - DMK leh AIADMK party member-te chu House laiah an chhuak khawm a, Congress leh party dangten lungawi lohna thu an lo aupui zui bawk.

Leader of Opposition leh Congress senior leader Ghulam Nabi Azad chuan Supreme Court-in Rafale deal chungchang thutlukna a siam danah sorkar chuan court chu kawng dik lo lamah a hruai nia an ngaih thu sawiin, hemi chungchang sawiho an phutna thu pawh an hriattir tawh tih a sawi.

Supreme Court chuan sorkar laipui leh France-in Rafale fighter jet leina tur inremna an siam danah thil fel tawk lo a awm nia sawi a, chhuichian tura phutna petition thehluhte chu a lo hnawlsak a ni. Court chuan Rafale deal siam danah sumdawng duhsak bik neia sawina chu a finfiahna a hmuh loh thu a sawi a, court tana lo inrawlh vena chhan tur an hmu lo tih a sawi a ni.

Court thutlukna siam dan hi BJP chuan lawmawm a tih thu sawiin, rorelna dik tak niin a sawi. Mahse eptu party hrang hrang erawh chuan court rorel dan hi an thlawp loh thu sawiin, thil dik lo awm chu hailan ngei an phut chhunzawm a ni.

Nimina rorel inkhawmah hian AIADMK leh DMK member-te chuan Tamil Nadu leh Karnataka state-ten Cauvery lui tui an inchuh buaina chu chinfel thuai an phut thu sawiin inkhawm an au buai bawk.