SC-in union minister fapa bail phalna pek a hnawlsak

Supreme Court chuan Uttar Pradesh-a Lakhimpur Kheri-a loneitute beihna thleng kaihhnawiha man, union minister Ajay Mishra fapa, Ashish Mishra hnena bail-a chhuah phalna, Allahabad High Court-in a lo phalsak tawh chu a hnawlsak. Kar khat chhunga police kuta inpe turin Ashish Mishra chu a hriattir nghal bawk.

Chief justice NR Ramana, justice Surya Kant leh Hima Kohli-te awmna special bench chuan high court-in Asish Mishra bail dilna a phalsak chungchangah a ngaihtuah chiang lo nia sawiin, thil thlen dan kimchangte enfiah a, he buaina thlen ṭuma a tuarte chu an duh ang sawina hun pek an ni lo tiin, bail dilna hi ngaihtuah ṭhat leh turin a ti a ni.

Justice Surya Kant chuan an thutlukna siam hi chhiar chhuakin, "A tuartute an duh ang an sawina hun pek an nih loh avang leh, high court hian bail order chungchang hi hmanhmawh taka a siam avangin he thupek hi nemnghet pui theih a ni lo," a ti. Bail dilna hi judge ngai bawkin a ngaihtuah a ṭul kher lo tiin, high court chief justice kuta dah chu a ṭha zawk niin bench chuan a sawi bawk.

Nikum October 3 khan Lakhimpur-a loneitu, farm law duh lohna lantira nawrh huaihawta pungkhawmte awmnaah Ashish Mishra chuanna SUV chu tlanin awmkhawmte chu a hnawl a, mi pariat an thi a ni. He thil thleng avanga loneitu thinrimten an beih letnaah driver leh BJP worker pahnih an thi bawk a ni.

Ashish Mishra hi man niin, thla li a tan hnuah February 10 khan Allahabad High Court single bench judge chuan bail a dilna hi a phalsak a ni. Mahse loneitute chuan Supreme Court lamah Mishra bail phalsak a nihna hi hnawl turin ngenna an thlen ve leh a, March 16 khan Supreme Court chuan Uttar Pradesh sorkar leh Ashish Mishra hnenah bail hnawlsak tura ngenna siam chungchanga an chhanna thehlut turin a lo hriattir tawh bawk.