Kristiante laka sakhaw zalenna palzut a nih ṭhin dan tarlanna turin Chhattigarh-a Kristian pawlin YouTube channel siam

Chhattisgarh Christian Forum chuan an mi leh sate beih an nih fo avangin, India ram danpuiin sakhaw zalenna leh mitinte dikna chanvo a pekte palzut a nih dan pholanna turin social media platform, YouTube channel a siam.

He channel hi Forum hian a enkawl zui zel dawn a, Chattisgarh-a Kristiante dikna chanvo humhalh a nih theihna turin political party, bureaucracy leh police-ten sakhaw zalenna an bawhchhiat leh palzut dante tarlan ṭhin an tum.

Forum president Arun Pannalal chuan, "Sakhaw bil channel hi tam tak a awm tawh a, mahse kan channel erawh hi chu sakhaw zalenna chungchang bik tarlanna atan kan hmang dawn a ni. Kan dikna chanvo nei tur hian kan beih let ve a ngai a ni," a ti. He channel kaltlang hian sorkarin Kristiante security a ngaihthah dante pawh tarlan an tum a, expert-te nen talk show-te pawh buatsaih tel an tum bawk.

Chhattisgarh-a Kristiante hi midangte Kristian sakhuaa inleh luihtir tia puha beih an tawk fo a, Chhattisgarh ArchBishop chuan political party-te chuan Kristiante chu an thil tum tihhlawhtlinna hmanrua atan football ang maia an hman thu pawh a lo sawichhuak tawh a ni.