Covid-19 hri kai thar 90% dawnin an pung

India ramah hun eng emaw chen Covid-19 hri kai an tlahniam hnuah, Pathianni khan hri kai hmuh chhuah thar chu a hma ni aiin 90% dawnin an pung.

Pathianni khan hri kai thar hi 2,183 an awm a, Inrinnia hri kai zat aia an tamna hi 89.9% a tling. Hemi ni vek hian hri vanga thi mi 214 an awm leh bawk. Hripui vanga thi zinga 212 hi Kerala state ami an ni a, a hmaa an chhinchhiah tel loh, mi 62-te belh an nih avangin a tam phah ta a ni.

Ni khata hri kai thar, daily positivity rate pawh Inrinnia 0.31% a nih laiin Pathianniah 0.83% a kai chho leh.

Hetih lai hian hri kai mek, active case erawh 11,542-ah a la tlahniam. Hri len tirh aṭangin rampuma hri kai hmuh chhuah hi 4,30,44,280 an awm tawh a ni.

Delhi khawpuiah hri kai an pun belh zel a, Pathianni khan mi 1,518 in kai belh lehin, kumin March 3 hnua ni khata hri kai tam ber ni a ni. Delhi, Ghaziabad leh Noida-ah zirlai eng emaw zat hri kai an awm thar leh avangin school ṭhenkhat chu khar an ni bawk.

Survey neihin a tarlan danin, National Capital Region (NCR)-ah hian ni 15 chhung khan an hnaivai takte hnen aṭanga hri kai chhawng hi 500% in an pung.

State hrang hrangten Covid kaihhruaina an thlahdul chhoh tawh avangin hri kai pung thar leh hian hlauhthawnna a siam leh ṭan a ni. State tam tak chuan pawn chhuahnaa mask vuah lote pawh an hrem tawh lo a, hetih lai hian invenna atan mask erawh vuah chhunzawm turin mipuite chu ngen an ni thung.

UP sorkarin face mask vuahna tur thupek tichhuak leh
Hri kai an pun thar leh avangin Uttar Pradesh sorkar chuan nimin khan an state khawpui, Lucknow bakah NCR district parukah pawn chhuahnaah face mask vuah vek turin thupek a tichhuak thar leh.

April thla tir lam khan UP sorkar chuan hri lengin ziaawm lam a pan avangin face mask vuahna thupek hi a lo thladul tawh a ni. Mahse Delhi leh NCR-ah hri kai an pun chhoh leh vangin invenna tur thupek thar hi a tichhuak nghal a, chief minister Yogi Adityanath pawhin hri leng dinhmun chu ngun taka thlithlai reng turin official-te pawh a hriattir bawk.