Loneitute loan ba ngaihdam vek hma kan bei zel dawn : Rahul Gandhi

Congress president Rahul Gandhi chuan ramchhunga loneituten harsatna an tawh mek chungchang sawiin, loneitute loan ba te chu ngaihdam vek an nih hma chuan Prime Minister Narendra Modi chu lungmuang takin an muttir dawn lo tih a sawi.

Nimina Parliament kawta chanchinthar lakhawmtuten an kawmnaah Congress president chuan tun hnaia assembly inthlan neihna state-a campaig-naah an party-in sorkarna an chan chuan ni 10 chhunga loneitute loan ba ngaihdam sak an tiam a, state pahnihah chuan Congress sorkar lakluh a nih aṭanga darkar ruk chhungin an thutiam hi an tihhlawhtling nghal tih a sawi a ni.

Rahul Gandhi chuan loneitute tam takten loan ba avanga harsatna an tawh mek laiin, PM Modi leh BJP president Amit Shah ṭhiante loan chu ngaihdam sak an ni, a ti. Anil Ambani telin mi 15 te loan ba, cheng vaibelchhe nuai 3.5 ngaihdam a ni tih a sawi. Mi hausa leh sumdawngte chu side khatah dah niin, a side lehlamah mi retheite leh sumdawng tenaute dah an ni a, Congress leh eptu party dangte chu mi retheite tan hian an ding zel dawn tih a sawi.

PM Modi-an pawisa note lian pahnih a tihthih chu thil dik lo lian ber a ni tiin, Rahul Gandhi chuan sorkar laipui chuan mipuite, dawrkai leh loneitute pawisa a ruksak a ni, a ti. Thil tihsual tamtak pawh a rawn langchhuak zel a ni, a ti bawk.